އެމްޓީސީސީން ކުރިއަށްގެންދާ 144 މިލިއަން ރުފިޔާގެ މަޝްރޫޢުގެ ދަށުން، މާލޭގެ ވިޔަފާރީގެ މައި މަރުކަޒުގައި ޓްރެފިކްގެ މައްސަލަތަކަށް ޙައްލެއް ގެނައުމަށްޓަކައި ބޭންކް އޮފް ސިލޯން ކުރިމަތީގައި ބޮޑު ޕާކިންގ ޒޯނެއް ދަނީ ގާއިމުކުރަމުންނެވެ.
ޕާކިންގ ޒޯނާއި އުމްރާނީ ތަރައްޤީމޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބޮޑުތަކުރުފާނު މަގު އަލުން ތަރައްޤީކުރުމަށް ކުރިއަށްގެންދާ ބޮޑު މަޝްރޫޢުގެ ހަތަރުވަނަ ފިޔަވަހީގެ ދަށުން، 588 ސައިކަލު ޕާކުކުރެވޭނެ ޖާގައިގެ ޕާކިންގ ޒޯނެއް ހެދުމުގެ މަސައްކަތް ވަނީ ފަށާފައެވެ.
ޕީއެސްއެމްއަށް މަޢުލޫމާތު ދެއްވަމުން އެމްޓީސީސީގެ ޕްރޮޖެކްޓް މެނޭޖަރ ޝަރަވާޒް ޢަބްދުﷲ ވިދާޅުވެފައިވަނީ، މި ޕާކިންގ ޒޯން ގާއިމުކުރަމުންދަނީ ބޭންކް އޮފް ސިލޯން ކުރިމަތީގައި އޮންނަ ގާތްގަނޑަކަށް 1400 އަކަފޫޓުގެ ބިމެއްގައި ކަމަށެވެ.
ބޮޑުތަކުރުފާނު މަގުގެ އުތުރު ފަރާތަކީ ސަރުކާރުގެ އޮފީސްތަކާއި، ބޭންކުތަކާއި، ވިޔަފާރިތަކުގެ އިތުރުން ލޯކަލް މާރުކޭޓު ހިމެނޭ ސަރަޙައްދަށް ވުމާއެކު، މިއީ މާލޭގައި އެންމެ ކާރޫބާރޫ ބޮޑު އަދި އެންމެ ގިނަ މީހުން ދަތުރުފަތުރުކުރާ އެއް މަގެވެ. އެހެންކަމުން ދުވަހުން ދުވަހަށް ދަތުރުކުރާ އާންމުންނާއި އުޅަނދުފަހަރަށް އެކަށީގެންވާ ޕާކިންގ ނިޒާމެއް ގާއިމުކުރުމަކީ މި މަޝްރޫޢުގެ ވަރަށް މުހިންމު އަމާޒެކެވެ.
ތިމާވެއްޓާ ގުޅޭ މަސައްކަތްތަކާއި ފެހިކުރުންމި މަޝްރޫޢަކީ ހަމައެކަނި މަގު ފުޅާކޮށް ޒަމާނީ ފެންވަރަށް ތަރައްޤީކުރުމުގެ މައްޗަށް ބިނާވެފައިވާ މަޝްރޫޢެއް ނޫނެވެ. މަގުގެ އެކި ސަރަޙައްދުތައް ފެހިކޮށް، ތިމާވެއްޓަށް ހެޔޮ ބަދަލުތަކެއް ގެނައުމަކީވެސް އެމްޓީސީސީން އިސްކަންދޭ ކަމެކެވެ. އެގޮތުން، މަސައްކަތް ކުރިއަށްދާ ސަރަޙައްދުތަކުން ނަގާ ގަސްތައް އެހެން ސަރަޙައްދުތަކުގައި އިންދުމުގެ މަސައްކަތް ދަނީ ކުރަމުންނެވެ.
މިހާތަނަށް ނަސަންދުރަ އަދި އެފްއެސްއެމް އޮފީސް އިމާރާތް ހިމެނޭ ސަރަޙައްދުގައި ގަސްތައް ވަނީ އިންދާފައެވެ. މިއީ އިޤްތިޞާދީ މައި މަރުކަޒުގެ މާހައުލު ހިތްގައިމުކޮށް ބޭއްވުމަށް އެޅޭ ވަރަށް މުހިންމު ފިޔަވަޅެކެވެ.
މަޝްރޫޢުގެ ދުވެއްޔާއި މާލީ ތަފްޞީލުބޮޑުތަކުރުފާނު މަގު ތަރައްޤީކުރުމުގެ މަޝްރޫޢު މިހާރު ވަނީ ނިމުމަކާ ގާތްވެފައެވެ. އެމްޓީސީސީން ބަޔާންކުރާ ގޮތުގައި، އަމާޒަކީ ޖޫން މަހުގެ ނިޔަލަށް މަސައްކަތްކުރަމުންދާ ހުރިހާ ސަރަޙައްދެއްގެ މަސައްކަތް އެއްކޮށް ނިންމައި އާންމުންނަށް ހުޅުވާލުމެވެ. މަގު ފުޅާކުރުމާއި ފަޅު ހިއްކުމަށް ބޭނުންވާ ޝީޓް ޕައިލްކުރުމުގެ ބޮޑުބައެއް މިހާރު ވަނީ ނިމިފައެވެ.
މި މަޝްރޫޢުގެ ފުރަތަމަ ފިޔަވަހީގައި ހިމެނެނީ ލޯކަލް މާރުކޭޓުން ފެށިގެން ހެންވޭރު ފެރީ ޓަރމިނަލާ ހަމައަށް އޮންނަ 838 މީޓަރުގެ ސަރަޙައްދެކެވެ. ދިވެހިރާއްޖޭގެ ވިޔަފާރިއާއި އިޤްތިޞާދީ ހަރަކާތްތަކަށް ބޮޑު ކުރިއެރުމެއް ގެނެސްދޭނެ މި މުހިންމު މަޝްރޫޢު އެމްޓީސީސީއާ ހަވާލުކޮށްފައިވަނީ 144 މިލިއަން ރުފިޔާއަށެވެ.
ކިޔުންތެރިންގެ ހިޔާލު