ފާޑުކިއުންތައް އަމާޒުވާން ފެށުމުން އީރާނާއެކު ހަދާ އެއްބަސްވުމުގެ ދެލިކޮޕީ ފައިނަލްކުރަން އެމެރިކާގެ ރައީސް ޑޮނަލްޑް ޓްރަމްޕް ފަސްޖެހިއްޖެއެވެ.
އީރާނާއެކު ސޮއިކުރަން މިހާރު އެކުލަވާލާފައިވާ އެއްބަސްވުމުގެ ދެލިކޮޕީ ފައިނަލްކޮށް ރޭގައި އިއުލާންކުރަން އޮތް ނަމަވެސް އެމެރިކާގެ ރައީސް ޑޮނަލްޑް ޓްރަމްޕްވަނީ އެކަން ފަސްކޮށްފައެވެ. އަދި އީރާނާއެކު މަޝްވަރާކުރާ އޭނާގެ ޓީމަށް އަންގާފައިވަނީ އަވަސްއަރުވާލައިގެން އެއްބަސްވުން ފައިނަލްކުރަން އަދި މަސައްކަތް ނުކުރުމަށެވެ.
އަދި އީރާނާއެކު ހަދާ އެއްބަސްވުން ފައިނަލް ކުރެވި ސޮއި ކުރެވެންދެން ބްލޮކޭޑް ދަމަހައްޓަންވެސް އެމެރިކާ ސިފައިންނަށް ޓްރަމްޕް ވަނީ އަންގާފައެވެ.
އެއްބަސްވުމެއްގެ ދެލިކޮޕީ އެކަށައެޅިއްޖެކަމަށް ރިޕޯޓްތައް ފެތުރު ނަމަވެސް، ސީދާ އެއީ ކޮން އެއްބަސްވުމެއް ކަމެއް މީޑިއާއަށްވެސް އަދި ސާފެއް ނުވެއެވެ. މީޑިއާގައި ވަރަށް ގިނަ ޑްރާފްޓްތައް ދައުރުވަމުން އެބަ ދެއެވެ.
އެމެރިކާގެ ސަރުކާރާއި އަދި އިދިކޮޅު ފަރާތްތަކުންވެސް ގެންދަނީ، މިހާރު ފެންމަތިވެފައިވާ ޑްރާފްޓް އެއްބަސްވުންތަކަށް ފާޑުކިޔަމުންނެވެ.
އެމީހުން ބުނަމުންދަނީ، އެމެރިކާއިން އެ އެއްބަސްވުމުގައި ސޮއިކޮށްފިނަމަ އެއީ އީރާނާ ދެކޮޅަށް ހަނގުރާމައަށް ދިޔަ އެއްވެސް ކަމެއް ހާސިލްނުވެ އެމެރިކާ ހުސްއަތާ އެނބުރި އައުން ކަމަށެވެ. އަދި އީރާނު ކުރިއަށްވުރެ ބާރުގަދަވެގެން ދާނޭ ކަމަށްވެސް އެމީހުން ބުނަމުން ގެންދެއެވެ.
ދައުރުވަމުންދާ ބައެއް ޑްރާފްޓްތަކުގައި ބުނަނީ، ހަނގުރާމަ ހުއްޓާލާފައި އޮތް މުއްދަތު 30 ދުވަހަށް އިތުރުކުރުމަށް ދެ ފަރާތުން އެއްބަސްވެފައިވާ ކަމަށެވެ. އެ މުއްދަތުގެ ތެރޭގައި ވާހަކަތައް ކުރިއަށް ގެންދިއުމާއި، ހޮރްމޫޒު ކަނޑުއޮޅި މުޅިން ހުޅުވާލައި އެމެރިކާގެ ބްލޮކޭޑްވެސް ނިމުމަކަށް ގެންނަންޖެހެއެވެ.
އެކަމަކު، ޓްރަމްޕް މިހާރު ބުނަމުންގެންދަނީ އީރާނާއެކު އެއްބަސްވުމެއް ހެދި ސޮއިކުރެވެންދެން ބްލޮކޭޑް ދެމިއޮންނާނޭ ކަމަށެވެ. ޓްރަމްޕްގެ ޚިޔާލު މިހާރުވަނީ މުޅީން އަނެއްކޮޅަށް އެނބުރިގެން ގޮސްފައެވެ.
ކިޔުންތެރިންގެ ހިޔާލު