އެމެރިކާގެ ރައީސް ޑޮނަލްޑް ޓްރަމްޕް ވައިޓް ހައުސްގެ އޯވަލް އޮފީހުގައި ސަރަހައްދުގެ ގައުމުތަކުގެ ވެރިންނަށް ފޯނުން ގުޅުއްވަމުން އެބަ ގެންދަވާ ކަމަށް ބައިނަލްއަގްވާމީ މީޑިއާއިން ރިޕޯޓްކުރަމުން އެބަ ގެންދެއެވެ.
ރޮއިޓަރސްއިން ބުނެފައިވަނީ، އެމެރިކާގެ ރައީސް ފޯނުން ގުޅުއްވަމުން ގެންދަވަނީ ސައުދީ އަރަބިއްޔާ، ގަތަރު، ޔޫއޭއީ، މިސްރު، ތުރުކީ އަދި ޕާކިސްތާނުގެ ވެރިންނަށް ކަމަށެވެ.
އެމެރިކާގެ ރައީސް ޓްރަމްޕް އެ ގައުމުތަކުގެ ވެރިންނަށް ގުޅުއްވަމުން ގެންދަވަނީ، އީރާނާއެކު އެއްބަސްވުމެއް ހެދުމަށް ދެކެވެމުންދާ ވާހަކަތަކުގެ ނަތީޖާއާ ގުޅޭގޮތުން ކަމަށް ރިޕޯޓްތައް ބުނެއެވެ.
އީރާނާއި އެމެރިކާއާ ދެމެދު ބާއްވާ ނުސީދާ ވާހަކަތަކުގެ މެދުވެރިއެއްގެ ދައުރު އަދާކުރާ ޕާކިސްތާނު އަސްކަރިއްޔާގެ ވެރިޔާ ފީލްޑް މާޝަލް ޖެނެރަލް ސައްޔިދު އާސިމް މުނީރު، އީރާނުގެ ވެރިންނާއެކު ބޭއްވި މަޝްވަރާތަކަށްފަހު މިހާރުވަނީ ތެހެރާނުން ފުރާވަޑައިގެންފައެވެ.
ޕާކިސްތާނު އަސްކަރިއްޔާއިން ބުނެފައިވަނީ، ޖެނެރަލް މުނީރުއާއި އީރާނުގެ ވެރިންނާއެކު ދެކެވުނު ވާހަކަތަކުން އުންމީދީ ކުރިއެރުންތަކެއް ހޯދިފައިވާ ކަމަށެވެ.
އަނެއްކޮޅުން އެމެރިކާގެ ރައީސް ޑޮނަލްޑް ޓްރަމްޕްވެސް ބުނެފައިވަނީ، އީރާނާއެކު އެއްބަސްވުމެއް ހެދުމުގެ ފުރުސަތު އޮތީ “ފިފްޓީ ފިފްޓީ” ކަމަށެވެ. އީރާނުގެ ހުށަހެޅުންތަކުގެ ފަންސާސް އިންސައްތައަށް އޭނާ އެއްބަސްވާ ކަމަށާއި، ފަންސާސް އިންސައްތަ ފުރުސަތު އޮތީ ހަނގުރާމައަށް ދިއުމަށް ކަމަށެވެ.
ކަށަވަރު ނުވާ ބައެއް ރިޕޯޓްތައް ބުނަނީ، ހަނގުރާމަ ހުއްޓާލަން އެމެރިކާއާއި އީރާނާ ދެމެދު ވެފައިވާ އެއްބަސްވުމުގެ މުއްދަތު 60 ދުވަހަށް އިތުރުކުރަން ހުށަހެޅި ދެފަރާތުންވެސް އެކަމަށް އެއްބަސްވެފައިވާ ކަމަށެވެ. މި ހުށަހެޅުން އައީ ޕާކިސްތާނުގެ ފަރާތުންނެވެ. ނަމަވެސް މިކަން އަދި ކަށަވަރެއް ނުވެއެވެ.
އެމެރިކާގެ ރައީސް ޓްރަމްޕް ސަރަހައްދުގެ ގައުމުތަކުގެ ވެރިންނަށް ފޯނުން ގުޅުއްވަމުން ގެންދަވާއިރު، ސަރަހައްދުގެ ގައުމުތަކުގެ ވެރިންނާއި ޚާރިޖީ ވަޒީރުންވެސް ގުޅުއްވައި، މަސްރަހާ ގުޅޭގޮތުން މަޝްވަރާތައް ކުރައްވަމުން އެބަ ގެންދަވައެވެ. އެންމެންވެސް މިހާރު ތިބީ ނޭވާ ހިފަހައްޓާލައިގެންނެވެ.
އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެމުން ގޮސްފައިވަނީ، ހަފްތާ ބަންދާ ހަމައަށް އީރާނާއެކު އެއްބަސްވުމެއް ނުހެދިއްޖެނަމަ އަސްކަރީ ހަމަލާތައް ފަށާނޭ ކަމަށެވެ.
ޕާކިސްތާނު މެދުވެރިވެގެން ދެކެވުނު ވާހަކަތަކުގައި އީރާނުންވެސް ގިނަ ކަންތައްތަކެއްގައި ދޫދީފައިވާ ކަމަށް ރިޕޯޓްތައް ބުނަމުން ގޮސްފައި ވެއެވެ. ނަމަވެސް، ދެ ފަރާތުން އެއްބަސްވީ ކަންކަމެއް އަދި އެއްބަސްނުވާ ކަންކަމެއް އަދި ސާފެއް ނުވެއެވެ.
އީރާނުން ތަކުރާރުކޮށް ބުނަމުން ގޮސްފައިވަނީ، އީރާނު ރައްޔިތުންގެ ހައްގުތައް ގަބޫލުކޮށް އެމެރިކާގެ ރައީސަށް ޖެހޭނީ އީރާނުގެ ޑިމާންޑްތަކަށް އެއްބަސްވުމަށް ކަމަށެވެ.
ކިޔުންތެރިންގެ ހިޔާލު