ހުޅުމާލޭގެ ފަޅުތެރެއަށް މޫދަށް ފޭބި ދިވެއްސަކު ގެއްލިގެން އޭނާ ހޯދުމުގެ މަސައްކަތް ފުލުހުންނާއި ސިފައިން ގުޅިގެން ފަށައިފިއެވެ.
ފުލުހުން މައުލޫމާތު ދީފައިވާ ގޮތުގައި، މި ހާދިސާ ހިނގާފައިވަނީ މިއަދު އިރުއޮއްސި 18:30 އެހާކަންހާއިރުއެވެ. ގެއްލިގެން ހޯދަމުންދަނީ ހުޅުމާލޭގެ ސްޓެލްކޯއާ ދިމާލުން ފަޅުތެރެއަށް ވަލެއް އެއްސުމަށްޓަކައި މޫދަށް ފޭބި ދިވެހި ފިރިހެނެކެވެ.
މި މީހާ ގެއްލުނު ކަމުގެ ރިޕޯޓް ލިބުމާ ގުޅިގެން، އޭނާ ހޯދުމުގެ އޮޕަރޭޝަން މިހާރު ވަނީ ފަށާފައެވެ. މި މަސައްކަތުގައި ދިވެހި ފުލުހުންގެ ހިދުމަތާއި އެމްއެންޑީއެފް ކޯސްޓްގާޑުގެ ޑައިވަރުން އަންނަނީ ހަރަކާތްތެރިވަމުންނެވެ. ނަމަވެސް، ގެއްލިގެން ހޯދަމުންދާ މީހާގެ އުމުރާއި އޭނާއާ ބެހޭ އެއްވެސް އިތުރު ތަފްސީލެއް ފުލުހުން އަދި ހާމަކޮށްފައެއް ނުވެއެވެ.
މި ހާދިސާއާ ގުޅިގެން ފަޅުތެރެ ބެލުމުގެ މަސައްކަތް މެދުކެނޑުމެއް ނެތް ގޮތެއްގައި ކުރިއަށްދާ ކަމަށް ކަމާބެހޭ އިދާރާތަކުން މައުލޫމާތު ދެއެވެ.
ކިޔުންތެރިންގެ ހިޔާލު