ޣައްޒާގެ ހިސާރު ފޫއަޅުވާލަން ދަތުރުކުރަނިކޮށް ބައިނަލްއަގްވާމީ ކަނޑުގެ ސަރަހައްދުން އިސްތިއުމާރީ ސިފައިން ރަހީނުކުރި ގްލޯބަލް ސުމުދް ފްލޮޓިލާގެ ބައިވެރިން ތުރުކީއަށް ގެންގޮސްފިއެވެ.
އިސްތިއުމާރީ ސިފައިން ރަހީނުކުރި 428 އެކްޓިވިސްޓުންގެ ތެރެއިން އިސްތަމްބޫލަށް ގޮސްފައިވަނީ 422 އެކްޓިވިސްޓުންނެވެ.
އެމީހުން ތުރުކީއަށް ގެންގޮސްފައިވަނީ ތުރުކީ ސަރުކާރުން އިންތިޒާމުކުރި ޚާއްސަ ތިން މަތިންދާ ބޯޓެއްގައެވެ. އެމީހުން ތުރުކީއަށް ގެންދިއުމުގެ މަސައްކަތް ކުރިއަށް ގެންގޮސްފައިވަނީ ތެލް އަވީވްގައި ހުންނަ ތުރުކީ އެމްބަސީ މެދުވެރިކޮށެވެ.
ފްލޮޓިލާގެ ބައިވެރިން އިސްތިއުމާރީ އިސްރާއީލުން “ޑީޕޯޓް” ކޮށްލީއެވެ.
ދޫކޮށްލި 422 މީހުންގެ ތެރޭގައި ތުރުކީގެ 85 ރައްޔިތުންވެސް ހިމެނެއެވެ.
ސުމުދް ފްލޮޓިލާގައި ހިމެނިގެން ޣައްޒާއަށް ދަތުރުކުރި 54 ބޯޓަށް އިސްތިއުމާރީ ސިފައިން ހަމަލާދީ ބޯޓުތަކުން ދަތުރުކުރި އެންމެން ހައްޔަރު ކޮށްފައިވަނީ މިދިޔަ ހޯމަ ދުވަހާއި އަންގާރަ ދުވަހުއެވެ. ބޯޓުތަކަށް ހަމަލާދިނީ ބައިނަލްއަގްވާމީ ކަނޑުގެ ސަރަހައްދުން ދަތުރުކޮށްފައި ދަނިކޮށެވެ.
ފްލޮޓިލާގައި ހިމެނޭ އުޅަނދުތަކުގައި ތިބި މީހުންގެ ގަޔަށް ރަބަރު ވަޒަނުން ހަމަލާދީ، ޕްރެޝަރުގައި ފެންޖަހައި އަދި ބޯޓުތަކުގައި އަސްކަރީ އުޅަނދުތައް ޖައްސައި ގެންލުންދީ އަދި ރާޅުބާނި އުފައްދައި ބޯޓުތައް ފައްތަންވެސް އިސްތިއުމާރީ ސިފައިން މަސައްކަތް ކޮށްފައި ވެއެވެ.
އަދި ފްލޮޓިލާގެ ހުރިހާ ބައިވެރިން ހައްޔަރުކޮށްގެން އިސްރާއީލަށް ގެންގޮސް އެމީހުންގެ އަތްތައް ފަހަތަށްލައި ބިޑިއަޅުވައި އެމީހުންގެ ގައިގައި ތަޅައި ބޮޑެތި އަނިޔާތައްވެސް ކޮށްފައި ވެއެވެ.
ފްލޮޓިލާގެ އަންހެން އެކްޓިވިސްޓަކަށް އިސްތިއުމާރީ އިސްރާއީލުގެ ޓެރަރިސްޓު ނޭޝަނަލް ސެކިއުރިޓީ މިނިސްޓަރ ބެން ގްވީރް ހަމަލާދޭ މަންޒަރާއި، ރަހީނުކުރި މީހުންނާ ދިމާއަށް ހުތުރު އެއްޗެހި ގޮވައި، ޓެރަރިސްޓަށް ގޮވައި މަލާމާތްކުރާ މަންޒަރުގެ ވީޑިއޯ އާންމުވެ މުޅި ދުނިޔޭގެ ނުރުހުމާއި ދެކޮޅުވެރިކަން އިސްރާއީލަށް އަމާޒުވަމުން އެބަ ދެއެވެ.
ސުމުދް ފްލޮޓިލާގައި ދުނިޔޭގެ ފަންސާހަށްވުރެ ގިނަ ގައުމުގެ އެކްޓިވިސްޓުން ހިމެނޭއިރު، އޭގެ ތެރޭގައި ޑޮކްޓަރުންނާއި، ގާނޫނީ ވަކީލުންނާއި، ޕާލަމެންޓުތަކުގެ ކުރީގެ މެމްބަރުންނާއި، ސިޔާސީ ލީޑަރުންނާއި، އިންސާނީ ހައްގުތަކަށް މަސައްކަތްކުރާ އެކްޓިވިސްޓުންވެސް ހިމެނެއެވެ.
ރަހީނުކުރި އެކްޓިވިސްޓުންނަށް އިސްތިއުމާރީ ދައުލަތުން ބޮޑެތި އަނިޔާކޮށް، އިހާނެތިކޮށް ހިތި މައްސަލަ ހޫނުވެ، ޔޫރަޕްގެ އެތައް ގައުމަކުން އިސްރާއީލުގެ އެމްބަސެޑަރުން ހާޟިރުކޮށް ރަސްމީކޮށް މައާފަށް އެދެން ޑިމާންޑް ކުރަމުން ގެންދެއެވެ. އަދި ބައެއް ގައުމުތަކަށް ބެން ގްވީރު އެރުން މަނާކުރަންވެސް ގެންދަނީ މަސައްކަތް ކުރަމުންނެވެ.
އެކަމަކު، އިސްތިއުމާރީ ދައުލަތުން ގްލޯބަލް ސުމުދް ފްލޮޓިލާއަށް ބައިނަލްއަގްވާމީ ކަނޑުގެ ސަރަހައްދުން ހަމަލާދިނުމާއި، އެކްޓިވިސްޓުން ރަހީނުކުރުމާއި، އެންމެން ހައްޔަރުކޮށްގެން ގެންގޮސް ބޮޑެތި އަނިޔާތައް ކުރުމުންވެސް އިސްރާއީލާ ދެކޮޅަށް ޚާއްސަކޮށް ޔޫރަޕްގެ ގައުމުތަކުން އެކަށީގެންވާ ފިޔަވަޅު ނާޅާތީ ބޮޑެތި ފާޑުކިއުންތައްވެސް އަމާޒުވަމުން އެބަދެއެވެ.
ކިޔުންތެރިންގެ ހިޔާލު