އިނގިރޭސިވިލާތުން ރާއްޖޭގެ ކަނޑުމަހުގެ ބާވަތްތަކުން ނަގާ ޓެރިފް މައާފުކުރުމަކީ ރައީސް ޑރ. މުއިއްޒުގެ ހާރިޖީ ސިޔާސަތުގެ ކާމިޔާބީއެއް ކަމަށް ސަރުކާރުގެ އިސް ތަރުޖަމާނު މުހައްމަދު ހުސައިން ޝަރީފް ވިދާޅުވެއްޖެއެވެ.
އިނގިރޭސިވިލާތުން މީގެ ކުރިން ރާއްޖޭގެ ކަނޑުމަހުގެ ބާވަތްތަކުން 20 އިންސައްތައިގެ ޓެކްސްއެއް ނަގަމުން އައި ނަމަވެސް، މިހާރު ވަނީ 2028 ވަނަ އަހަރުގެ ނިޔަލަށް އެ ޓެރިފް މައާފުކޮށްފައެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ތަރުޖަމާނު ވިދާޅުވީ މިއީ ރާއްޖޭގެ މަސްވެރިކަމުގެ ސިނާއަތަށް ލިބުނު ތާރީހީ ކުރިއެރުމެއް ކަމަށާއި، މިއީ ރައީސް ވެވަޑައިގެންނެވި ވައުދުތައް ފުއްދަވަމުން ގެންދަވާކަމުގެ ހެއްކެއް ކަމަށެވެ.
ރައީސް ވެރިކަމާ ހަވާލުވެވަޑައިގެންނެވި ދުވަހުން ފެށިގެން މި އަމާޒަށް ވާސިލުވުމަށް ސްޓްރެޓީޖިކް ގޮތުން މަސައްކަތް ކުރައްވާފައިވާ ކަމަށް ތަރުޖަމާނު ވިދާޅުވިއެވެ. އެގޮތުން، އިނގިރޭސިވިލާތަށް ކުރެއްވި ރަސްމީ ދަތުރުފުޅުގައި އިނގިރޭސި ރަސްގެފާނާ ބައްދަލުކުރައްވައި، ރައީސް ވަނީ މި މައްސަލަ ސީދާ އެމަނިކުފާނުގެ އަރިހުގައި ދަންނަވާފައެވެ. ރަސްގެފާނާ އެކު ބޭއްވި ބައްދަލުކުރެއްވުމުގައި، ރާއްޖޭގެ ކަނޑުމަހަކީ ފެންވަރު ރަނގަޅު އަދި އިނގިރޭސި މާކެޓުގައި ޑިމާންޑް ބޮޑު އުފެއްދުމެއްކަން ރައީސް ވަނީ ފާހަގަކުރައްވާފައެވެ.
މީގެ ކުރިން ނަގަމުން އައި 20 އިންސައްތައިގެ ޓެރިފްގެ ސަބަބުން ދިވެހި މަސްވެރިންނަށް އެކަށީގެންވާ އަގު ނުލިބުމުގެ ގޮންޖެހުންތަކާ ކުރިމަތިލާން ޖެހުނެވެ. ނަމަވެސް ރައީސްގެ ސީދާ ބައިވެރިވުމާ އެކު، ދެ އަހަރެއްހާ ދުވަހުގެ މަސައްކަތުން އިނގިރޭސިވިލާތުގެ ޑިއުޓީ މައާފުކުރާ ލިސްޓުގައި ރާއްޖެ ހިމެނުމަށް ވަނީ ކާމިޔާބު ހޯދާފައެވެ. ތަރުޖަމާނު ވިދާޅުވި ގޮތުގައި، ގައުމެއްގެ އިސްވެރިއަކު މިފަދަ ވިޔަފާރީގެ އެއްބަސްވުމަކަށް ސީދާކޮށް ލޮބީ ކުރެއްވި މިއީ ފުރަތަމަ ފަހަރެވެ.
ކުރިއަށް އޮތް މަސައްކަތްތައްރާއްޖެއިން އަހަރަކު ގާތްގަނޑަކަށް 16.7 މިލިއަން ޕައުންޑާއި 18 މިލިއަން ޕައުންޑާ ދެމެދުގެ އަދަދަކަށް ކަނޑުމަސް އިނގިރޭސިވިލާތަށް އެކްސްޕޯޓް ކުރެއެވެ. އަދި އެ ގައުމަށް އެންމެ ގިނައިން މަސް ފޯރުކޮށްދޭ ގައުމުތަކުގެ ތެރޭގައި ރާއްޖެ ހިމެނެނީ ނުވަ ވަނައިގައެވެ. މި ލުއި ދާއިމީ ކުރުމަށް އިނގިރޭސި ސަރުކާރާ އެކު މަޝްވަރާތައް ކުރިއަށް ގެންދާނެ ކަމަށް ވެސް ތަރުޖަމާނު ވިދާޅުވިއެވެ.
ކިޔުންތެރިންގެ ހިޔާލު