ދައުލަތުގެ މާލީ ހާލަތު ރަނގަޅުކުރުމަށް އަޅަމުންދާ އިގްތިސާދީ ފިޔަވަޅުތަކުގެ ތެރޭގައި ރައްޔިތުންނަށް ފޯރުކޮށްދޭ އަސާސީ ޚިދުމަތްތައް ހުއްޓާލުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސިޔާސަތެއް ނޫން ކަމަށް ސަރުކާރުގެ ތަރުޖަމާނު މުހައްމަދު ހުސައިން ޝަރީފް މިއަދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ތަރުޖަމާނު ފާހަގަކުރެއްވި ގޮތުގައި، ދައުލަތުގެ މާލިއްޔަތު ހަރުދަނާ ކުރުމުގެ މަސައްކަތް ކުރިއަށް ގެންދާނީ ރައްޔިތުންގެ ދިރިއުޅުމުގެ ފެންވަރަށް ނޭދެވޭ އަސަރު ނުކުރާނެ ފަދަ ގޮތަކަށެވެ. އަސާސީ ޚިދުމަތްތައް ހުއްޓާލައިގެން މާލީ ހާލަތު ރަނގަޅު ކުރުމަކީ ދެމެހެއްޓެނިވި އަދި ސަރުކާރުން ގެންގުޅޭ ސިޔާސަތަކާ ހިލާފު ކަމެއް ކަމަށް އޭނާ ވިދާޅުވިއެވެ. ގައުމުގެ މާލީ ހާލަތު ނާޒުކުކަން ގަބޫލުކުރައްވައި، ސަރުކާރުން މަސައްކަތް ކުރަމުންދަނީ އެ ހާލަތުން އަރައިގަތުމަށް ޒިންމާދާރު ފިޔަވަޅުތަކެއް އެޅުމަށް ކަމަށް އޭނާ ފާހަގަކުރެއްވިއެވެ.
ބޭރުގެ ދަރަނިތައް އަދާކުރުމަށް ސަރުކާރުން އެންމެ ބޮޑު އިސްކަމެއް ދެމުންދާކަން ހާމަކުރައްވަމުން ތަރުޖަމާނު ވިދާޅުވީ، ދަރަންޏެއް ޑީފޯލްޓް ވެއްޖެނަމަ ގައުމުގެ އިގްތިސާދަށް އޭގެ ނޭދެވޭ އަސަރު ވަރަށް ބޮޑަށް ކުރާނެ ކަމަށެވެ. ފާއިތުވި ދެ އަހަރާ އަޅާބަލާއިރު ބޭރުގެ ދަރަނި މިހާރު ހުރީ މެނޭޖްކުރެވޭ ފަދަ ހާލަތެއްގައި ކަމަށާއި، ކުރިއަށް އޮތް ސެޕްޓެމްބަރު މަހު ދައްކަންޖެހޭ ދަރަނީގެ ޕޭމަންޓްތައް ދެއްކޭނެ ކަމުގެ ފުރިހަމަ ޔަގީންކަން އޭނާ ދެއްވިއެވެ.
އެތެރޭގެ ދަރަނި ނުވަތަ ޑޮމެސްޓިކް ޑެޓް ހުރީ ސަރުކާރުން ބޭނުންވާ މިންވަރަށްވުރެ މަތީގައި ކަމަށް ތަރުޖަމާނު އެއްބަސްވެވަޑައިގެންނެވިއެވެ. މި ދަރަނި ކުޑަކުރުމުގެ މަސައްކަތް ކުރާނީ މަރުހަލާތަކަކަށް ބަހާލައިގެން ކަމަށާއި، މިގޮތުން ހަރަދު ކުޑަކުރުމަށް ފިޔަވަޅުތަކެއް އަޅަން ޖެހިއްޖެ ހާލަތެއްގައި އެންމެ ބޮޑު އަސަރެއް ކުރާނީ ޕީއެސްއައިޕީ މަޝްރޫއުތަކަށް ކަމަށް އޭނާ ބަޔާންކުރެއްވިއެވެ. ސަރުކާރުން މިހާރު ފަށާފައިވާ މާލީ އިސްލާހީ މަސައްކަތްތައް ފުރިހަމަވުމުން، ދައުލަތުގެ ހަރަދުތައް ކުޑަވެ، މާލީ ހާލަތު މުޅިން ރަނގަޅުވެގެންދާނެ ކަމުގެ އުއްމީދު ސަރުކާރުން ކުރެއެވެ.
ކިޔުންތެރިންގެ ހިޔާލު