އަންގާރަ ދުވަހު އީރާނަށް އަސްކަރީ ހަމަލާދޭން ފަށަން ނިންމުމަށްފަހު ހަމަލާތައް މަޑުޖައްސާލީ ގަލްފްގެ ބައެއް ގައުމުތަކުގެ ވެރިން އެދިގެން ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.
ވައިޓް ހައުސްގައި ބޭއްވި ޕްރެސް ކޮންފަރެންސެއްގައި އެމެރިކާގެ ރައީސް ބުނީ، އީރާނަށް ދޭން ނިންމި ހަމަލާތައް މަޑުޖައްސާލީ ގަތަރުގެ އަމީރު ޝައިޚް ތަމީމް ބިން ހަމަދް އައްޘާނީއާއި، ސައުދީ ވަލީއަހުދު މުހައްމަދު ބިން ސަލްމާންއާއި، ޔޫއޭއީގެ ރައީސް މުހައްމަދު ބިން ޒައިދް އަލް ނަހްޔާންގެ އެދިވަޑައިގަތުމަށް ކަމަށެވެ.
އެބޭފުޅުންނަކީ އެމެރިކާގެ ވަރަށް ގާތް ބައިވެރިން ކަމަށާއި، އެމެރިކާއިން އިހްތިރާމްކުރާ ބޭފުޅުން ކަމަށްވެސް، އެމެރިކާގެ ރައީސް ޓްރަމްޕް ބުނެފައި ވެއެވެ.
އަދި މިވަގުތު ސީރިއަސް މަޝްވަރާތަކެއް ކުރެވެމުންދާތީއާއި، އެމެރިކާއާއި މެދުއިރުމަތީގެ ގައުމުތަކުންވެސް ގަބޫލުކުރާނޭ އެއްބަސްވުމެއް ހެދިގެން ދާނޭކަމަށް އެބޭފުޅުން ދެކިވަޑައި ގަންނަވާ ކަމަށް އެމެރިކާގެ ރައީސް ބުނެފައި ވެއެވެ.
އޭގެފަހުން އޭނާގެ އަމިއްލަ ޓުރުތު ސޯޝަލްގައި ޕޯސްޓްކުރި މެސެޖެއްގައި ޓްރަމްޕް ބުނެފައިވަނީ، އީރާނާއެކު ހެދޭ އެއްބަސްވުމެއްގައި، ނިއުކްލިއަރ ހަތިޔާރު ނުއުފައްދަން އީރާނު އެއްބަސްވާންޖެހޭނޭ ކަމަށެވެ. މީގެން ދޭހަކޮށްދެނީ އީރާނަށް ހަމަލާދޭނޭ ކަމުގެ ބިރު ދައްކައިގެން ޓްރަމްޕް ރުހޭފަދަ އެއްބަސްވުމެއް ހެދުމަށް މަސައްކަތް ކުރާކަމެވެ.
އީރާނަށް އަސްކަރީ ހަމަލާދިނުން މަޑުޖައްސާލަން ނިންމައިފިކަން އެމެރިކާގެ ރައީސް އިއުލާން ކުރިއިރު، އީރާނަށް އަންގާރަ ދުވަހު ހަމަލާދޭން ނިންމިކަމެއް އެމެރިކާގެ ރައީސް އަދި އެމެރިކާގެ އެހެން ވެރިޔަކުވެސް ކުރިން ބުނެފައެއް ނުވެއެވެ. ރިޕޯޓްތައް ބުނަމުންދިޔައީ، އީރާނަށް ހަމަލާދިނުމާ ގުޅޭގޮތުން ގޮތެއް ނިންމަން ވައިޓް ހައުސްގެ ސިޗުއޭޝަން ރޫމްގައި އަންގާރަ ދުވަހު ސިއްރު ސައްލާއެއް ބޭއްވުމަށް ނިންމާފައިވާ ކަމަށެވެ.
ޓްރަމްޕް ބުނީ، އީރާނުން އެކަށީގެންވާ ހުށަހެޅުމެއް ލިބެންދެން ހަމަލާތައް ނުދީ ދެތިން ދުވަހަށް ބަލާނޭ ކަމަށާއި، އޭގެފަހުން ހަމަލާތައް ދޭން ފަށަން އަސްކަރިއްޔާއަށް އަމުރުކުރާނޭ ކަމަށެވެ.
އީރާނަށް ހަމަލާދޭން ނުފަށައި މަޑުޖައްސާލި ނަމަވެސް، އެމެރިކާގެ ރައީސްވަނީ، އީރާނު ކައިރިއަށް ޖަމާކޮށްފައިވާ ލަޝްކަރުތައް ތައްޔާރީ ހާލަތުގައި ތިބުމަށް އަންގާފައެވެ.
ކިޔުންތެރިންގެ ހިޔާލު