މިއަހަރުގެ ޙައްޖުގެ މާތް އަޅުކަން އަދާކުރުމަށް ދިވެހި ޙައްޖާޖީން ސައުދީ އަރަބިއްޔާއަށް ދިޔުމުގައި ކުރިއަށްގެންދިޔަ “މައްކާ ރޫޓް އިނީޝިއޭޓިވް” ކާމިޔާބުކަމާއެކު ތަންފީޒުކުރުމުގައި އެހީތެރިވި ދިވެހި ހުރިހާ މުއައްސަސާތަކަކަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ޝުކުރު އަދާކުރައްވައިފިއެވެ.
ވަޒީރު މިކަން ހާމަކުރެއްވީ އެމަނިކުފާނު މީސްމީޑިއާގައި ކުރެއްވި ޕޯސްޓެއްގައެވެ. ވަޒީރު ވިދާޅުވި ގޮތުގައި، 1445 ވަނަ އަހަރުގެ (2024 ވަނަ އަހަރުގެ) ޙައްޖާޖީންނަށް މި ޚިދުމަތް ފޯރުކޮށްދިނުމުގައި ދިވެހިރާއްޖޭގެ އެކި މުއައްސަސާތަކުންނާއި އެޖެންސީތަކުން ދެއްވި ފުރިހަމަ އެއްބާރުލުމާއި، ކެނޑިނޭޅި ކުރެއްވި މަސައްކަތްތައް ފާހަގަކުރައްވައި އެ ފަރާތްތަކަށް އިޚްލާޞްތެރި ޝުކުރެއް އަދާކުރައްވާ ކަމަށެވެ.
ޚާއްޞަކޮށް ޙައްޖާޖީންގެ ދަތުރުފަތުރުގެ ކަންކަން ލުއިފަސޭހަކޮށްދީ، މި މުބާރަކް މަސައްކަތް އޮމާންކަމާއެކު ކުރިއަށް ގެންދިއުމުގައި މުއައްސަސާތަކުން ދެއްކެވި އިޚްލާޞްތެރިކަމާއި، ފަންނީ ހުނަރުވެރިކަމާއި، ޚިދުމަތްތެރިކަމުގެ ރޫޙަކީ މި މަޝްރޫޢު ކާމިޔާބުވުމުގެ މައިގަނޑު ސަބަބުކަމަށް ވަޒީރު ފާހަގަކުރެއްވިއެވެ.
ވަޒީރުގެ ޕޯސްޓް ނިންމަވާލައްވަމުން، މި މަސައްކަތުގައި ބައިވެރިވި ހުރިހާ ފަރާތްތަކަށް މާތްﷲ ހެޔޮ ދަރުމަ ދެއްވުމަށާއި، ޤައުމަށާއި ޙައްޖާޖީންނަށް ޚިދުމަތް ކުރުމުގައި އެ ފަރާތްތަކަށް ބަރަކާތް ލެއްވުން އެދި ދުޢާ ކުރައްވާފައިވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްނަގައިގެން ކުރިއަށްގެންދިޔަ މި “މައްކާ ރޫޓް” މަޝްރޫޢުގެ ދަށުން، ދިވެހި ޙައްޖާޖީން ސައުދީއަށް އެތެރެވުމުގެ އިމިގްރޭޝަން ކަންކަން ރާއްޖޭގައި ތިބެގެން ނިންމާލެވޭތީ، ޙައްޖާޖީންނަށް ވަނީ ވަރަށް ބޮޑު ލުއިފަސޭހައެއް ލިބިގެން ގޮސްފައެވެ.
ކިޔުންތެރިންގެ ހިޔާލު