މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އެތެރޭގެ އިންތިހާބު މިހާރު ކަނޑައަޅާފައިވާ ތާރީޚްގައި ނުބާއްވައިފިނަމަ، ޕާޓީގެ މަސްލަހަތު މިހާރަށްވުރެ ބޮޑަށް ގޯސްވެގެންދާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ތ. ކިނބިދޫގައި އެމަނިކުފާނުގެ ސަޕޯޓަރުންތަކަކާ ބައްދަލުކުރައްވައި ނަޝީދު ވިދާޅުވީ، ޕާޓީގެ ތެރޭގައި ޚިޔާލުތަފާތުވުންތަކެއް ހުރިކަމީ ގަބޫލުކުރަންޖެހޭ ހަގީގަތެއް ކަމަށެވެ. އެގޮތުން ކުރީގެ ރައީސް އިބްރާހީމް މުހައްމަދު ސޯލިހާ މެދު ހިތްހަމަނުޖެހޭ މީހުން ޕާޓީގައި ތިބި ފަދައިން، އެމަނިކުފާނާ މެދު ވެސް ހިތްހަމަނުޖެހޭ ބަޔަކު އެބަތިބި ކަމަށެވެ.
އެމަނިކުފާނު ވިދާޅުވީ ޕާޓީގެ ތެރޭގައި ތާއީދު އޮތީ ކޮން ފަރާތަކަށްތޯ ސާފުނުވާނަމަ، ކަންކަން ހައްލުކުރުމުގެ ނަމުގައި ކުރެވޭނެ ހަމައެކަނި ކަމަކީ ރައީސް ސޯލިހާއެކު ފޮޓޯއެއް ނެގުމެވެ. ނަމަވެސް އެއީ ދާއިމީ ހައްލެއް ނޫން ކަމަށާއި، އެފަދަ ކަމަކުން ހިތްހަމަޖެހުން ލިބުނަސް ހަފްތާއެއްހާ ދުވަސް ފަހުން އަނެއްކާވެސް ހިތްހަމަނުޖެހުންތައް އުފެދިގެންދާނެ ކަމަށް ނަޝީދު ވިދާޅުވި އެވެ.
“ތާއީދު ގިނައީ ކޮން ބަޔަކަށް ކަން ނޭގެންޏާ އަނެއްކާ ވެސް ޖެހޭނީ ރައީސް ސާލިހް އާ އެކު ތި ބޭފުޅުން ހިތްހަމަ ޖައްސަން ފޮޓޯއެއް ނަގަން. އެކަމަކު ހަފްތާއެއް ފަހުން އަނެއްކާވެސް ހިތްހަމަނުޖެހުން އުފެދޭނެ،” ނަޝީދު ވިދާޅުވިއެވެ.
ނަޝީދު މިފަދައިން ވިދާޅުވެފައި ވަނީ ފައިސާ ނެތް ކަމަށް ބުނެ އިންތިޚާބު ފަސްކުރަން އެމްޑީޕީގެ ވަގުތީ ޗެއާޕާސަން އަބްދުލްޣަފޫރު މޫސާ އުޅުއްވާ ދަނޑިވަޅެއްގައެވެ.
ކިޔުންތެރިންގެ ހިޔާލު