ނޫސްވެރިކަމުގެ މިނިވަންކަމުގައި ރާއްޖެ ފަހަތަށް ދަނީ ސަރުކާރުގެ ސަބަބުން ނޫން ކަމަށާއި އެކަމުގައި ނޫސްވެރިންގެ ޒިންމާވެސް އޮންނަކަމަށް ސަރުކާރުގެ އިސް ތަރުޖަމާނު މުހައްމަދު ހުސައިން ޝަރީފް (މުންދު) ވިދާޅުވެއްޖެއެވެ.

ރިޕޯޓާސް ވިތައުޓް ބޯޑާސް (އާރުއެސްއެފް) ގައި ނޫސްވެރިކަމުގެ މިނިވަންކަމުގައި ރާއްޖެ ހަތަރު ދަރަޖަ ފަހަތަށް ޖެހިފައިވުމާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި އެކަމަށް އިޝާރާތް ކުރައްވައި ތަރުޖަމާނު ވިދާޅުވީ ނޫސްވެރިކަމުގެ މިނިވަންކަމުގެ އިންޑެކްސްގައި ރާއްޖެ ފަހަތަށް ދަނީ ސަރުކާރުން ކުރާ ކަމަކުން، ކަަމަށް ބައެއް ނޫސްވެރިންނަށް ހީވާކަމަށެވެ. އޭގައި ނޫސްވެރިންގެ ޒިންމާވެސް އޮންނަަކަމަށް ތަރުޖަމާނު ވިދާޅުވިއެވެ.

ބައްލަވާ ޕްރެސް ފްރީޑަމް އިންޑެކްސް އެބޭފުޅުން މިނެކިރަނީ ހަމަ އެކަނި ސަރުކާރަކުން ނޫނޭ. ސަރުކާރުގެ ޕަފޯމެންސް ނުވަތަ ސަރުކާރަކުން މީޑިއާއާ އޮންނަ ގުޅުން އޮންނަނީ ރަނގަޅަށްތޯ ގޯސްކޮށްތޯ، ތިރިއަށްތޯ މައްޗަށްތޯ، މަދުތޯ ގިނަތޯ އެކަންޏެއް ނޫނޭ. އޭގެ ޒިންމާ ތިބޭފުޅުން ނޫސްވެރިން ވެސް އޮވޭ.

ސަރުކާރުގެ ތަރުޖަމާނު ވިދާޅުވިއެވެ.

އެހެންކަމުން މިކަންކަން ރަނގަޅުކުރުމަށް މަސައްކަތްކުރުމަށް ތަރުޖަމާނު އެދިވަޑައިގެންނެވިއެވެ.

ނޫސްވެރިކަމުގެ މިނިވަންކަމުގެ އިންޑެކްސް ބައެއް ފަހަރު ފަހަތަށް ދަނީ ކޮމްޕެރެޓިވްކޮށް ކަމަށާއި މި އިންޑެކްސްގައި ގައުމެއް ހަތަރު ދަރަޖަ ފަހަތަށް ދިއުމަކީ އޭގެ ދަށުގައި އޮތް ބައެއް ގައުމުތައް 10 ވަރަކަށް ދަރަޖަ މައްޗަށް ކުރިއަށް އެރުން ކަމަށް ވެސް ވެދާނެކަމަށްވެސް ތަރުޖަމާނު ވިދާޅުވިއެވެ.