ޤައުމީ ޔުނިވާސިޓީން އަންނަނީ ޢިލްމީ ގޮތުން ކުރިއެރުން ހޯދައި އާ އުސްމިންތަކަށް ވާސިލުވަމުންކަމަށް އިސްލާމީކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ދިވެހިރާއްޖޭގެ ޤައުމީ ޔުނިވާސިޓީގެ ދަސްވެނިވުމުގެ ރަސްމިއްޔާތުގެ ދެވަނަ ދަންފަޅި ޝަރަފްވެރިކޮށްދެއްވައި ވާހަކަފުޅު ދައްކަވަމުންއިސްލާމީކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވަނީ ޤައުމީ ޔުނިވާސިޓީއަށް އަންނަމުންދާ ކުރިއެރުމާއި ޢިލްމީ ގޮތުން ޙާސިލްކުރަމުންދާ އާ އުސްމިންތައް ފާހަގަކުރައްވާ ޔުނިވާސިޓީގެ އިސްވެރިންނަށް ޝުކުރު އަދާކުރައްވާފައެވެ. މީގެ އިތުރުން މިއަދު ދަސްވެނިވި ދަރިވަރުންނާއި މުޚާޠަބުކޮށް މުހިއްމު ވާހަކަފުޅުތަކެއް ވަޒީރު ދެއްކެވިއެވެ.
އެގޮތުން ޢިލްމު ލިބިފައިތިބި މީހުންނަކީ ވަރަށް އޯގާތެރި ބަޔަކަށް ވާން ޖެހޭނެކަމަށާއި މީހުންނަށް އޯގާތެރިވުމާއި އެހީތެރިވުމަކީ ﷲ ސުބުޙާނަޙޫ ވަތަޢާލާ ނުހަނު މަތިވެރި ދަރަޖައަކަށް ލޯބިވެވޮޑިގަންނަވާކަމެއްކަން ވަޒީރު ފާހަގަކުރެއްވިއެވެ.
މީގެ އިތުރުން ކޮންމެ ދަރިވަރަކީވެސް އުއްމީދާއެކުގައި މަސައްކަތްކުރާ ދަރިވަރަކަށް ވާން ޖެހޭނެކަމަށާއި، އަބަދުވެސް ކުރިއަރާ ދިއުމަށް މަސައްކަތްކުރާ ދަރިވަރަކަށް ވާން ޖެހޭނެކަމަށް ވަޒީރު ވިދާޅުވިއެވެ.
މުސްލިމުންނަކީ އަބަދުވެސް އުއްމީދީ ބަޔަކަށް ވާން ޖެހޭނެ. ތިމާގެ ޙަޔާތުގައި ތިމާއަށް ކުރިމަތިވާ ގޮންޖެހުންތަކުގެ ކުރިމަތީގައި ވަރުގަދަ ފަރުބަދައެއް ފަދަ ނުގުޑާ ފަދަ ޢަޒުމްހުރި މީހަކަށް ވާން ޖެހޭނެ.
އިސްލާމީކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު
ވަޒީރުގެ ވާހަކަފުޅުގައި ވަނީ މިފަދަ ޝަރަފްވެރި ރަސްމިއްޔާތަކަށް ދަޢުވަތު ދެއްވީތީ ޔުނިވާސިޓީގެ އިސްވެރިންނަށް ޝުކުރު އަދާކުރައްވާފައެވެ.
މިއަދު މެންދުރުފަހު ކުރިއަށްދިޔަ މި ދަންފަޅީގައި، ދިވެހިރާއްޖޭގެ ޤައުމީ ޔުނިވާސިޓީގެ ޗާންސެލަރާއި، ވައިސް ޗާންސެލަރު އަދި ޔުނިވާސިޓީގެ އިސްވެރިން ވަނީ ބައިވެރިވެލައްވާފައެވެ. މި ދަންފަޅީގައި ޤައުމީ ޔުނިވާސިޓީގެ 4 ފެކްލަޓީއަކުން 116 ދަރިވަރުން ދަސްވެނިވެފައިވެއެވެ.
ކިޔުންތެރިންގެ ހިޔާލު