ގަލްފް ކޯޕަރޭޝަން ކައުންސިލް – ޖީސީސީގެ ވެރިންގެ ކުއްލި އަދި ކުރު ސަމިޓެއް ސައުދީ އަރަބިއްޔާގެ ޖިއްދާގައި ބާއްވައިފިއެވެ.
ސަމިޓްގެ ރިޔާސަތު ބެލެހެއްޓެވީ ސައުދީ ވަލީ އަހުދު އަދި ސައުދީ ސަރުކާރުގެ ބޮޑުވަޒީރު މުހައްމަދު ބިން ސަލްމާންއެވެ.
މިއީ، އެމެރިކާއާއި އިސްރާއީލުން އީރާނާ ދެކޮޅަށް ހަނގުރާމަ ފެށިފަހުން ގަލްފްގެ ގައުމުތަކުގެ ވެރިން ސީދާ ބައްދަލު ކުރެއްވި ފުރަތަމަ ފަހަރެވެ.
ސަމިޓަށް ވަޑައިގެންނެވީ، ކުވައިތުގެ ވަލީއަހުދު ޝައިޚް ސަބާހް ޚާލިދު އަލް ހަމަދް އައްސަބާހް އާއި، ގަތަރުގެ އަމީރު ޝައިޚް ތަމީމް ބިން ހަމަދު އައްޘާނީއާއި، ބަހްރެއިންގެ ރަސްގެފާނު ހަމަދް ބިން އީސާ އަލް ޚަލީފާއާއި، ޔޫއޭއީގެ ޚާރިޖީ ވަޒީރު ޝައިޚް ޢަބްދުﷲ ބިން ޒައިދު އަލް ނަހްޔާންއެވެ.
ބައްދަލުވުމުގެ ބޭނުމަކީ، އީރާނުގެ މިސައިލްތަކާއި ޑްރޯން ހަމަލާތަކުން ގަލްފްގެ ގައުމުތަކުގެ ހަކަތައިގެ ސިނާއަރާއި އާންމު އިންފްރާސްޓްރަކްޗަރއަށް ލިބުނު ބޮޑެތި ގެއްލުންތަކަށް، ގައުމުތައް ގުޅިގެން ރައްދުދޭނޭ ގޮތެއް ހޯދުމަށް މަޝްވަރާ ކުރުމެވެ.
އެމެރިކާއާއި އިސްރާއީލުން އީރާނަށް ހަމަލާދޭން ގަލްފްގެ ގައުމުތައް ބޭނުންކޮށްފައިވާތީ، އީރާނުންވަނީ ޖީސީސީގައި ހިމެނޭ 6 ގައުމަށް ވަރުގަދަ ވައިގެ ހަމަލާތަކެއް ދީފައެވެ. އެ ގައުމުތަކަކީ؛ ބަހްރެއިން، ކުވައިތު، އުމާން، ގަތަރު، ސައުދީ އަރަބިއްޔާ އަދި ޔުނައިޓެޑް އަރަބް އެމިރޭޓްސް-ޔޫއޭއީއެވެ.
އީރާނުން ރައްދު ހަމަލާތައް މައިގަނޑު ގޮތެއްގައި ދީފައިވަނީ އެގައުމުތަކުގައި ހުރި އެމެރިކާގެ އަސްކަރީ ބޭސްތަކަށެވެ. އެއީ، އީރާނަށް ހަމަލާދޭން އެ ތަންތަން ބޭނުން ކުރާތީއެވެ.
އުމާނާއި ގަތަރުން ސުލްހައިގެ މަގު ބޭނުންކޮށްގެން މައްސަލަތައް ހައްލުކުރަން ތާއީދުކުރާއިރު، ޔޫއޭއީ އަދި ސައުދީގެ ވިސްނުން އެކަމުގައި ތަފާތު ކަމަށް ރިޕޯޓްތައް ބުނެއެވެ.
އެކަމަކު، ކުއްލި ސަމިޓެއް މިބޭއްވީ، ގަލްފްގެ ގައުމުތަކަށް ދިމާވެފައިވާ މައްސަލަތަކުގެ ދަނޑިވަޅުގައި ޖީސީސީ އެއްބައިވަންތަ ޖަމާއަތެއްގެ ގޮތުގައި އޮތުމަށް މަސައްކަތް ކުރުމަށެވެ.
ސަމިޓަށްފަހު ގަތަރުގެ އަމީރު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، މިހާރު ހިނގަމުންދާ ކަންކަމާމެދު ގަލްފުގެ އެއްބައިވަންތަވެ އޮތުމަށް ގޮތްތަކެއް ނިންމުނު ކަމަށެވެ.
ކިޔުންތެރިންގެ ހިޔާލު