މުޅި ސަރުކާރުގެ ސައިޒު ކުޑަކުރުމުގެ މަސައްކަތް ބާރަށް ކުރިއަށްދާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ، މުވައްޒަފުން ކޮށްފައިވާ ޚިދުމަތަށާއި، ފަރުވާތެރިކަމަށް ބަލައި މުވައްޒަފުން މަދުކުރުމުގެ މަސައްކަތްކުރިއަށްދާކަމަށެވެ. މުޅި ސަރުކާރުގެ ސައިޒު ކުޑަކުރުން ހުއްޓުމެއްނެތި ހިނގަމުންދާކަމަށާއި، ކުރިއަށް އޮތްތަނުގައި ކުންފުނިތަކުންނާއި އެނޫންވެސް ގޮތްގޮތުން މަދުކުރެވުނު ޢަދަދު ހާމަކުރައްވާނެކަަމަށް ރައީސް ވިދާޅުވިއެވެ.
މުޅި ސަރުކާރުގައި ތިބި ސިޔާސީ މުވައްޒަފުން މަދުކުރުމުގެ މަރުހަލާ ކުރިއަށް އެބަދޭ. އެ މަރުހަލާ ނިމުނީމަ އޭގެތެރެއިން ވަރަށް ގިނަ ބޭފުޅުންގެ ވަޒީފާ އުވިގެންދާނެ. އެހެންވީމަ ސަރުކާރުގެ ސައިޒު ކުޑަކުރުމުގެ މަރުހަލާ އެބަ ހިނގާ.
Advertisement
ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ، ސަރުކާރުގެ ބައެއް މިނިސްޓްރީތައް މަދުކުރުމަކީ އެ މަސައްކަތުގެ ދަށުން އެޅި ފުރަތަމަ ފިޔަވަޅު ކަމަށާއި، ސިޔާސީ މުވައްޒަފުން މަދުކުރުމަށް މިހާރު ކުރަމުން އަންނަ މަސައްކަތްތައް ނިމުމުން އޭގެ ތަފުސީލު އާންމުކުރައްވާނެކަމަށެވެ.
މިސަރުކާރު އުފެދުނުއިރު ކެބިނެޓުގައި 20 ވަޒީރުން ހިމެނިވަޑައިގެންނެވިނަމަވެސް، އެ ޢަދަދު މިހާރު ވަނީ 15އަށް މަދުކުރައްވާފައެވެ. ރައީސް ވިދާޅުވީ ވަޒީރުން ވަކިކުރައްވައި ކެބިނެޓު މިނިސްޓަރުގެ އަދަދު މަދުކުރެއްވީވެސް ސައިޒު ކުޑަކުރުމަށް ކުރެއްވި އެއް މަސައްކަތްތަކަމަށެވެ. އެކަން ކުރެއްވީ ވަޒީރުންގެ ޕާފޯމަންސަށްވެސް ބައްލަވާފައިކަމަށް ރައީސް ވިދާޅުވިއެވެ.
ސަރުކާރުގެ ސައިޒު ކުޑަކުރައްވާނެކަަމަށް ރައީސް ވިދާޅުވެފައިވާއިރު، ދައުލަތުގެ ކުންފުނިތަކުގެ މުވައްޒަފުންގެ އަދަދު 33 ޕަސެންޓު ދަށްކުރަންވެސް ވަނީ އަންގާފައެވެ.
ކިޔުންތެރިންގެ ހިޔާލު