މިދިޔަ މަހު ރާއްޖެއިން އެކްސްޕޯޓްކުރި މަހުގެ އަދަދު އިތުރުވެއްޖެއެވެ.
މޯލްޑީވްސް ކަސްޓަމްސް ސަރވސްއިން އާންމުކުރި ތަފާސް ހިސާބުތައް ދައްކާގޮތުގައި މިދިޔަ މަހު ރާއްޖެއިން ވަނީ 69 މިލިޔަން ރުފިޔާގެ މަސް އެކްސްޕޯޓުކޮށްފައެވެ. އަދި މިއަހަރުގެ ފެބުރުވަރީމަހު 51 މިލިޔަން ރުފިޔާގެ މަސް އެކްސްޕޯޓްކޮށްފައިވެއެވެ. އެހެންކަމުން މަހުން މަހަށް ބަލާއިރު މަސް އެކްސްޕޯޓުކުރި މިންވަރު ވަނީ %35 އިތުރުވެފައެވެ.
މައިގަނޑުގޮތެއްގައި ރާއްޖެއިން އެކްސްޕޯޓުކުރަނީ ކަޅުބިލަމަހާއި ރީނދޫ އުރަހަ ކަންނެލިއެވެ. އެގޮތުން ކަޅުބިލަމަސް ގަނޑުކޮށްގެން، ތާޒާކޮށް، އަދި ދަޅުގައި ބަންދުކޮށްގެން ރާއްޖެއިން އެކްސްޕޯޓުކުރެއެވެ. ކަސްޓަމްސްއިން ތަފާސްހިސާބުތައް ދައްކާގޮތުން މާރިޗުމަހު ރާއްޖެއިން ދަޅުގައި ބަންދުކޮށްގެން ކަޅުބިލަމަސް އެކްސްޕޯޓުކުރި މިންވަރު ވަނީ %75 އިތުރުވެފައެވެ. އެގޮތުން ފެބުރުވަރީމަހު މި އަދަދު ހުރީ 29 މިލިޔަން ރުފިޔާގައެވެ. މިއަދަދު މާރިޗު މަހު ވަނީ 51 މިލިޔަން ރުފިޔާއަށް އިތުރުވެފައެވެ.
މާރިޗު މަހުގެ ހިސާބުތައް ދައްކާގޮތުން އެކްސްޕޯޓްކުރި ދަޅު މަސް 51 މިލިޔަން ރުފިޔާއަށް އަރައެވެ. އެކްސްޕޯޓްކުރި ގަނޑުކުރި ކަޅުބިލަ މަސް 8 މިލިޔަން ރުފިޔާއަށް އަރާއިރު ތާޒާ ކަންނެލި މަސް އެކްސްޕޯޓްކުރި މިންވަރު 6 މިލިޔަން ރުފިޔާއަށް އަރައެވެ.
ރާއްޖެއިން އެންމެ ގިނައިން އެކްސްޕޯޓްކުރަނީ މަހުގެ ބާވަތްތަކެވެ. އެކްސްޕޯޓް އިތުރުކުރުމަށް ސަރުކާރުން އަންނަނީ މަސައްކަތްކުރަމުންނެވެ.
ކިޔުންތެރިންގެ ހިޔާލު