މާލޭ މަސް މާރުކޭޓު ކުއްޔަށް ދީފައިވަނީ މާލޭ ސިޓީ ކައުންސިލުގެ ބިޑު ކޮމިޓީގެ ނިންމުމާ ހިލާފަށް ކަމަށްބުނެ، އެ އެއްބަސްވުން ކުރިއަށް ގެންދިއުމާ މެދު ގޮތެއް ނިންމަން ސިޓީ ކައުންސިލުން ފާސްކޮށްފިއެވެ.
މާލޭ މަސް މާރުކޭޓު، 2021 ވަނަ އަހަރު ހަވާލުކޮށްފައިވަނީ އެފްޖޭ ޑިޒައިން ކިޔާ ކުންފުންޏަކާއެވެ.
މާލޭ ސިޓީ ކައުންސިލުން މިދިޔަ ހަފުތާގައި ބޭއްވި އާންމު ޖަލްސާގައި މާލޭ ސިޓީގެ މޭޔަރު އާދަމް އާޒިމް ވިދާޅުވީ، މަސް މާރުކޭޓު ދޫކުރުމުގެ އެއްބަސްވުމުގައި މައްސަލަތަކެއް ފާހަގަކުރެވިފައިވާ ކަމަށެވެ.
ކޮންޓްރެކްޓުގައި ފުށޫއެރުންތަކެއް އެބަހުރި ކަމަށާއި އެގޮތުން ކައުންސިލުގެ ބިޑު ކޮމިޓީން އެތަން ކުއްޔަށް ދޫކުރަން ނިންމާފައި އޮތީ މަހަކު 130،000 ރުފިޔާއަށް ނަމަވެސް އެ އެއްބަސްވުން ހަދާފައި އޮތީ 70،000 ރުފިޔާއަށް ކަމަށެވެ. އެތަނުގެ ކަރަންޓު ބިލަށް 437،926 ރުފިޔާ ނުދައްކާ އެބައޮތް ކަމަށްވެސް އާޒިމް ވިދާޅުވިއެވެ.
އާޒިމް ވިދާޅުވީ މިހާރު އޮތް ކޮންޓްރެކްޓުގައި ފުށުއަރާ ކަންކަން ހުރީމާ އެންމެ ރަނގަޅު ގޮތަކީ، އަލުން އެ މަސައްކަތް ކުރިއަށް ގެންދިއުން ކަމަށާއި މަސް މާރުކޭޓު ދޫކުރުމާ ބެހޭ ލިޔުންތައް ދެން އޮންނަ ކައުންސިލްގެ ބައްދަލުވުމެއްގައި ހޯދައި މަޝްވަރާތައް ކުރައްވާނެ ކަމަށެެވެ.
ކިޔުންތެރިންގެ ހިޔާލު