ޖިންސީ ފުރައްސާރައިގެ ޝަކުވާ ރައްދުވާ ފަރާތަކީ ޔުނިފޯމް އެޅި ޚިދުމަތެއްގެ މީހެއް ނަމަ، އެފަދަ މައްސަލަތައް ސިވިލް ކޯޓަށް ހުށަހަޅަންޖެހޭގޮތަށް ޖިންސީ ފުރައްސާރަ އާއި ގޯނާކުރުން ހުއްޓުވުމާ ބެހޭ ގާނޫނަށް ސަރުކާރުގެ ފަރާތުން އިސްލާހު ހުށަހަޅައިފިއެވެ.

ސަރުކާރުގެ ފަރާތުން މި އިސްލާހު ހުށަހެޅުއްވީ ކެލާ ދާއިރާގެ މެންބަރު އަބްދުﷲ ޝަރީފެވެ.

އެފަދައިން އިސްލާހު ހުށަހަޅާ ސަބަބެއް ކަމަށް އެ ބިލްގައި ބަޔާންކޮށްފައި ވަނީ ރައްޔިތުންގެ އިތުބާރު އޮންނަ ބާރުވެރި މަގާމެއްގައި ހުރި ފަރާތަކަށްވާތީ، އެފަދަ މައްސަލަތައް ނިންމުމުގައި އެންމެ މަތީ މިންގަނޑުތަކުން ކަންކަން ބަލަންވާނެތީއެވެ. އެހެންވެ އެފަދަ އިދާރާއެއްގެ މުވައްޒަފެއްގެ މައްސަލަ ހުށަހަޅަންޖެހޭނީ ކޯޓަށް ކަމަށް ބިލްގައިވެއެވެ.

އަލަށް ހުށަހެޅި އިސްލާހުގައި ވަޒީފާދޭ ތަންތަނުގައި އުފައްދާފައިވާ ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ކޮމިޓީތަކުން މައްސަލަ ބަލަންޖެހޭ އުސޫލުތައް ވަނީ ތަފުސީލުކޮށްފައެވެ. އެގޮތުން، ކޮމިޓީއަށް ހުށަހެޅޭ މައްސަލަތައް 60 ދުވަހުގެ ތެރޭގައި ބަލައި ނިންމަންޖެހޭނެ ކަމަށް އިސްލާހުގައިވެއެވެ. އަދި އިތުރު މުއްދަތު ބޭނުންވާނަމަ 30 ދުވަސް އިތުރުކުރެވިދާނެ ކަމަށް ބަޔާންކޮށްފައިވެއެވެ. މީގެއިތުރުން މައްސަލަ ބަލައި ނިންމުމަށްފަހު ފިޔަވަޅެއް އަޅާނަމަ، އެކަން ފަސް ދުވަހުގެ ތެރޭގައި އަންގަންޖެހޭނެ ކަމަށް ވެސް އެ ބިލްގައިވެއެވެ.

އަލަށް ހުށަހެޅި އިސްލާހުގައިވާ ގޮތުން، މައްސަލަ ބަލާ މުއްދަތުގައި ޝަކުވާ ރައްދުވާ ފަރާތް މުސާރަ ހިނގާގޮތަށް ސަސްޕެންޑު ކުރުމުގެ ބާރު ކޮމިޓީއަށް ލިބިގެންވެއެވެ. ކޮމިޓީގައި ދެ ޖިންސުގެ މެންބަރުން ހިމެނުން މި އިސްލާހުން ލާޒިމްކުރެއެވެ.