އިދިކޮޅު އެމްޑީޕީގެ ޗެއާޕާސަން ކަމަށް ވާދަކުރައްވާ ކުރީގެ ރައީސް މުހައްމަދު ނަޝީދު ބަލިކޮށް، ޗެއާޕާސަން ކަމުގެ އިންތިޚާބު ކާމިޔާބު ކުރައްވާނެ ކަމަށް އެ މަގާމަށް ވާދަކުރައްވާ ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހްމަދު ނަސީމް ވިދާޅުވެއްޖެއެވެ.
“އިތުބާރު”ގެ ނަމުން ނަންދީފައިވާ މީކާއީލްގެ ކެމްޕޭން ލޯންޗުކުރުމަށް މިއަދު ބޭއްވި ހަފްލާގައި އޭނާ ވިދާޅުވީ ޗެއާޕާސަންގެ އިންތިޚާބު ކާމިޔާބު ކުރެވޭނެ ކަމާމެދު އޭނާގެ ހިތުގައި އެއްވެސް ޝައްކެއް ނެތް ކަމަށެވެ.
“އަޅުގަނޑުގެ ހިތުގައި އެއްވެސް ޝައްކެތް ނެތް މި އިންތިހާބު ކާމިޔާބު ކުރާނީ އިތުބާރު ކެމްޕޭން،” މީކާއީލް ވިދާޅުވިއެވެ.
މީކާއީލް ވިދާޅުވީ ޗެއާޕާސަން ކަމަށް ވާދަކުރައްވަނީ ކުރީގެ ރައީސް އިބްރާހިމް މުހައްމަދު ސޯލިހާއި އެމްޑީޕީގެ ރައީސް އަބްދުالله ޝާހިދުގެ ތާއިދާ އެކު ކަމަށެވެ. ނަމަވެސް މީކާއީލަށް ތާއީދު ކުރައްވާކަން އެ ދެ ބޭފުޅުން މިހާތަނަށް ވިދާޅުވެފައެއްނުވެއެވެ.
މީގެއިތުރުން ކުރީގެ ނައިބު ރައީސް ފައިސަލް ނަސީމާއި އެމްޑީޕީގެ ގިނަ މަޖިލިސް މެންބަރުންގެ ތާއީދު އެބައޮތް ކަމަށް އޭނާ ވިދާޅުވިއެވެ.
ނަޝީދާއި މީކާއީލްގެ އިތުރުން އެ ޕާޓީގެ ކުރީގެ ނައިބު ރައީސް އަލްހާން ފަހުމީ ވެސް ޗެއާޕާސަން ކަމަށް ވާދަކުރައްވައެވެ.
ކިޔުންތެރިންގެ ހިޔާލު