ދައުލަތުގެ ބޯކިބާފޮތިން ބައެއް ހޯދަން ބޭނުންނުވާ ކަމަށް ވިދާޅުވެ، އެމްޑީޕީގެ ޗެއާޕާސަން ކަމަށް ވާދަކުރައްވާ ކުރީގެ ރައީސް މުހައްމަދު ނަޝީދަށް ވާދަވެރި ކެންޑިޑޭޓް މީކާއީލް އަހްމަދު ނަސީމް ވަރުގަދަ ރައްދެއް ދެއްވައިފިއެވެ.
ސަރުކާރު ދެފަޅިކޮށް ސަރުކާރުގެ ވެރިޔަކާއި ދައުލަތުގެ ވެރިއެއް ހުންނަންޖެހޭ ނިޒާމެއް ގާއިމް ކުރުމަކީ ނަޝީދު ހުށަހެޅުއްވި ބޮޑު ބަދަލުގައި ހިމެނޭ ސިޔާސަތެކެވެ. އެ ސިޔާސަތުގައި ހިމެނޭ ދައުލަތުގެ ވެރިޔާގެ މަގާމް ބޭނުންފުޅުވާކަމަށް ވެސް ނަޝީދު ވަނީ ކުރިން ވިދާޅުވެފައެވެ.
ރޭ ބޭއްވި ކެމްޕޭން އިވެންޓެއްގައި ވާހަކަދައްކަވަމުން މީކާއީލް ވިދާޅުވީ ޗެއާޕާސަންގެ މަގާމަށް ވާދަކުރައްވަނީ ދައުލަތުގެ ބޯކިބާފޮތިން ބައެއް ހޯއްދެވުމަށް ނޫން ކަމަށާއި އޭނާ މަސައްކަތް ކުރަނީ ޕާޓީގެ އާންމު މެންބަރުން އެތަކެއް އަހަރުތަކެއް ވަންދެން ބޭނުންވެފައި ތިބި އިސްލާހީ ބަދަލުތައް ޕާޓީއަށް ގެނެސް، 2028ގެ ރިޔާސީ އިންތިހާބު އެމްޑީޕީގެ ކެންޑިޑޭޓަށް ކާމިޔާބުކޮށް ދިނުމަށް ކަމަށެވެ.
އޭނާ ވިދާޅުވީ ޕާޓީއަށް 20 އަހަރު ވެގެން ދިޔައިރުވެސް، ޕާޓީގެ އޮފީސް ހިންގަން ކުލި ދެއްކޭނެ ދެމެހެއްޓެނިވި ނިޒާމެއް ގާއިމުކުރެވިފައި ނެތުމަކީ މައްސަލައެއް ކަމަށެވެ.
ކޮންމެ އިންތިޚާބަކާ ދިމާކޮށް ޕާޓީގެ މުދަލާއި އިންވެންޓްރީއަށް ވާނުވާ ނޭނގޭ މައްސަލައަށް ހައްލެއް ހޯދައިދީ، ހަރުދަނާ އިންވެންޓްރީއެއް އުފެއްދުމަކީ އޭނާގެ އެއް އަމާޒު ކަމަށް ވިދާޅުވިއެވެ.
“އަޅުގަނޑު މިއުޅެނީއަކީއެއް ދިވެހި ދައުލަތުގެ ބޯކިބާފޮތި ބަހާލާއިރު އަޅުގަނޑަށް އޮތީ ކޯއްޗެއްތޯ ބަލާކަށް ނޫން. އަޅުގަނޑު މިއުޅެނީ މި ޕާޓީގެ އާންމު މެންބަރުންގެ ހިތާއި ވިންދު ޕާޓީގެ އެ އޮފީހުގެ ފިނި ކޮޓަރިއަށް ވައްދަން,” މީކާއިލް ވިދާޅުވި އެވެ.
ކިޔުންތެރިންގެ ހިޔާލު