ކުރިއަށް އޮތް އެމްޑީޕީގެ ޗެއާޕާސަން އިންތިޚާބުގައި ވާދަކުރައްވާ ކެންޑިޑޭޓުންގެ ތެރެއިން އެ ޕާޓީގެ މަޖިލިސް މެންބަރުން ތާއީދުކުރާނެ ކެންޑިޑޭޓަކީ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމްކަން ހާމަކޮށްފިއެވެ.

އެމްޑީޕީގެ މަޖިލިސް މެންބަރުން މިއަދު ބޭއްވި ނޫސްވެރިންގެ ބައްދަލުވުމުގައި ތޮއްޑޫ ދާއިރާގެ މެންބަރު ހުސައިން ސަމީރު ފިޔަވައި އެހެން ހުރިހާ މެންބަރުން ބައިވެރިވެވަޑައިގަތެވެ.

އެ ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޑީޕީ ޕާލަމެންޓްރީ ގްރޫޕްގެ ލީޑަރު އިބްރާހީމް ނާޒިލް ވިދާޅުވީ، މީކާއީލަކީ ޔޫތު ވިންގް ރައީސެއްގެ ގޮތުގައި ހުންނެވި އިރުން ފެށިގެން ޕާޓީއަށްޓަކައި މުހިންމު މަސައްކަތްތަކެއް ކުރެއްވި ބޭފުޅެއް ކަމަށެވެ.

“މަޖިލީހުގެ ފުރަތަމަ އަހަރާއި ދެވަނަ އަހަރުގައި މަޖިލިސް މެންބަރުންގެ ގޮތުގައި އަޅުގަނޑުމެން ކުރި މަސައްކަތުގެ ނަތީޖާ ވަރަށް ފޮނި. އެ މަސައްކަތްތަކުގެ އެންމެ ބޮޑު އެއް ބައިވެރިއެއް އެމްޕީ މީކާއީލް އަކީ،” ނާޒިލް ވިދާޅުވިއެވެ.

އެ ބައްދަލުވުމުގައި ބައިވެރިވެވަޑައިގަތް ކޮންމެ މަޖިލިސް މެންބަރަކު ވަކިވަކިން ވަނީ މީކާއީލްއަށް ތާއީދުއޮތް ކަމަށް ވިދާޅުވެ ވާހަކަދައްކަވާފައެވެ.

މީކާއީލްގެ އިތުރުން އެމްޑީޕީގެ ޗެއާޕާސަންގެ މަގާމަށް ވާދަކުރަނީ ކުރީގެ ރައީސް މުޙައްމަދު ނަޝީދާއި ފޭދޫ ދާއިރާގެ ކުރީގެ މެންބަރު  އަލްހާން ފަހުމީއެވެ.