އެމްޑީޕީގެ ރިޔާސީ ޕްރައިމަރީގައި ވާދަކުރައްވަން ނިންމާފައިވާ އެއްވެސް ބޭފުޅަކަށް ތާއީދު ނުކުރައްވާ ކަމަށް ވިދާޅުވީ އެ ޕާޓީގެ ޗެއާޕާސަން ކަމަށް ވާދަކުރައްވާ މީކާއީލް އަހްމަދު ނަސީމް އިތުރުފުޅުހައްދަވައިފިއެވެ.

މީކާއީލްގެ ކެމްޕޭން ލޯންޗުކުރުމަށް އިއްޔެ ބޭއްވި ރަސްމިއްޔާތުގައި އޭނާ ވިދާޅުވީ ރިޔާސީ ޕްރައިމަރީގައި ވާދަކުރައްވާ އެއްވެސް ބޭފުޅަކަށް ތާއީދު ނުކުރައްވާ ކަަމަށެވެ. އަދި މަސައްކަތް ކުރާނީ ޗެއާޕާސަން ކަމަށް ވަޑައިގެން ވަކި ފަރާތަކަށް ނުޖެހި އިންސާފުވެރި ޕްރައިމަރީއެއް ބޭއްވުަމަށް ކަމަށް ވެސް އޭނާ ވިދާޅުވިއެވެ.

މީކާއީލް އެހެން ވިދާޅުވިއިރު، ކުރީގެ ރައީސް އިބްރާހީމް މުހައްމަދު ސޯލިހުގެ ކޮއްކޯފުޅު، އަދި ހުޅުމާލެ ދާއިރާގެ ކުރީގެ މަޖިލިސް މެންބަރު އަލީ ނިޔާޒު އިންނެވިއެވެ. މީކާއީލް އެހެއްދެވީ އިތުރުފުޅެއްކަން އެމްޑީޕީގެ ބައެއް އިސްބޭފުޅުން ކަށަވަރުކޮށްދެއްވިއެވެ.

ބައެއް އިސް ބޭފުޅުން ވިދާޅުވީ މީކާއީލް އަކީ ސޯލިހު ނެރެގެން އުޅޭ ކެންޑިޑޭޓެއް ކަމަށެވެ. ކެމްޕޭން ރޭވިފައިވާގޮތާއި ކެމްޕޭން ކުރިއަށްދާގޮތް ވެސް ސޯލިހު ގެންދަވަނީ ގާތުން ބައްލަވަމުންނެވެ.

މީކާއީލްގެ ވާހަކައިގައި އޭނައާ ވާދަކުރައްވާ ކުރީގެ ރައީސް މުހައްމަދު ނަޝީދަށް ނުސީދާކޮށް ރައްދުދެއްވިއެވެ.

އޭނާ ވިދާޅުވީ އުމުރުން 16 އަހަރުން ފެށިގެން ޕާޓީއަށް އެންމެ އުނދަގޫވި ދުވަސްތަކުގައި ވެސް ހުރީ ޕާޓީއާއެކު ކަމަށެވެ. ރިޔާސީ އިންތިހާބުގައި ވެސް ޕާޓީއާ ދުރަށް ނުދާ ކަމަށް އޭނާ ވިދާޅުވިއެވެ.

އެމްޑީޕީގެ ޗެއާޕާސަން ކަމަށް ވާދަކުރައްވާނެކަން ނަޝީދު އިއުލާންކުރެއްވީ ދާދިފަހުންނެވެ. ނަޝީދު ވަނީ އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލަށް ތާއީދުކުރައްވާކަން ވެސް ހާމަކުރައްވާފައެވެ.