ކުރިޔަށް އޮތް އެމްޑީޕީގެ އެތެރޭގެ އިންތިހާބުގައި އެޕާޓީގެ ޗެއާޕާސަންއަކަށް ވާދަކުރައްވަން ނިންމަވާފައިވާ ކުރީގެ ރައީސް މުހައްމަދު ނަޝީދުއަށް ތާއީދުކުރައްވާކަން އެ ޕާޓީގެ ކުރީގެ ޗެއާޕާސަން އަދި ކުރީގެ ޑިފެންސް މިނިސްޓަރު މާރިޔާ އަހްމަދުދީދީ ހާމަކުރައްވައިފި އެވެ.

އެމްޑީޕީގެ ޗެއާޕާސަންކަމަށް ވާދަކުރައްވަން ނިންމަވާފައިވާކަން ރައީސް ނަޝީދު ހާމަކުރެއްވީ އިއްޔެ ބޭއްވި ނޫސްވެރިންގެ ބައްދަލުވުމެއްގައިއެވެ.

ނަޝީދުގެ މިނިންމެވުމާއެކު އެކްސްގައި މާރިޔާ ކުރެއްވި ޕޯސްޓެއްގައި ވިދާޅުވީ އެމްޑީޕީ ކުރިޔަށް އޮތް އިންތިހާބަށް ތައްޔާރުވުމަށްޓަކައި ޕާޓީގެ ހިންގުން ހަވާލުކުރުމަށް އެންމެ ރަނގަޅު ފަރާތަކީ މިވަގުތު ނަޝީދު ކަމަށް ގަބޫލުފުޅު ކުރައްވާ ކަމަށެވެ. އެގޮތުން ނަޝީދުގެ ތަޖުރިބާއާއި ހިންގުންތެރިކަމާއި ސިޔާސީ ވިސްނުންފުޅަކީ މިވަގުތު އެމްޑީޕީއަށް އެންމެ މުހިންމު ކަންތައްތައް ކަމުގައި މާރިޔާ ފާހަގަކުރެއްވި އެވެ.

މާރިޔާ އިތުރަށް ވިދާލުވީ ޕާޓީއަށް މުހިންމު މި ދަނޑިވަޅުގައި، ޕާޓީއަށް ބޭނުންވަނީ، އިތުބާރު ހިފޭ ޤައުމީ މަސްލަހަތާއި ކުރިއަށް އޮތް އުނދަގޫ މަގުގައި ޕާޓީ ގޮވައިގެން ދަތުރުކުރެވޭނެ ވަރުގަދަ ލީޑާޝިޕެއް ކަމަށެވެ.

އެމްޑީޕީގެ ޗެއާޕާސަން ކަމަށް ކުރީގެ ރައީސް އިބްރާހީމް މުހައްމަދު ސޯލިހުގެ ފެކްޝަނުން ނެރޭ ކެންޑިޑޭޓަކީ ގަލޮޅު ދެކުނު ދާއިރާގެ މަޖިލިސް މެންބަރު މީކާއީލް އަހްމަދު ނަސީމެވެ.