މާލެ ސިޓީ ކައުންސިލާއި އައްޑޫ ސިޓީ ކައުންސިލަކީ ރައްޔިތުންނަށް ދޭންޖެހޭ ޚިދުމަތްތައް ދިނުމުގައި ފޭލްވެފައިވާ ދެ ކައުންސިލް ކަމަށް ވިދާޅުވެ، ހައުސިންގް، ލޭންޑް އެންޑް އާބަން ޑިވެލޮޕްމަންޓް މިނިސްޓަރު ޑރ. ޢަބްދުﷲ މުއްޠަލިބު މިއަދު މަޖިލީހުގައި ވަރަށް ބޮޑަށް ފާޑުވިދާޅުވެއްޖެއެވެ.
މަރަދޫ ދާއިރާގެ މެންބަރު އަޙްމަދު ދީދީ ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ، ރަށްރަށުގެ މަގުތައް މަރާމާތުކޮށް ބެލެހެއްޓުމަކީ ސަރުކާރުގެ ވުޒާރާއެއްގެ ޒިންމާއެއް ނޫން ކަމަށާއި، އެއީ އެ ރަށެއްގެ އިންތިޚާބީ ކައުންސިލްގެ ޒިންމާއެއް ކަމަށެވެ.
“ދައުލަތުން އެތައް ސަތޭކަ މިލިއަން ރުފިޔާއެއް އައްޑޫ ސިޓީ ކައުންސިލަށް ދޭއިރު، މަގުތަކުގައި ހުންނަ ވަޅުގަނޑުތައް މަރާމާތުކުރާނެ ނިޒާމެއް ނެތް ނަމަ، އަޅުގަނޑު ގަބޫލުކުރަނީ އެ ކައުންސިލް ފޭލްވެފައިވާ ކަމަށް،” މިނިސްޓަރު ވިދާޅުވިއެވެ.
މާލޭގެ މަގުތަކުގައި ފެންބޮޑުވާ މައްސަލައާއި މަގުތަކުގެ މަރާމާތާ ގުޅޭގޮތުން ވާހަކަދައްކަވަމުން މިނިސްޓަރު ވަނީ ކައުންސިލަށް ދޭ ބްލޮކް ގްރާންޓުގެ ބޭނުމާ މެދު ސުވާލު އުފައްދަވާފައެވެ.
“ކައުންސިލަށް ދޭ އެތައް ސަތޭކަ މިލިއަން ރުފިޔާގެ ބޭނުމަކީ ކޮބައިތޯ؟ ކައުންސިލް އޮންނަންވީ ހަމައެކަނި ރައްޔިތުންނާ ވާހަކަދައްކަންތޯ؟ އެބޭފުޅުން ކުރައްވަނީ ކޮން ކަމެއްތޯ؟” މިނިސްޓަރު ސުވާލު ކުރެއްވިއެވެ.
ބޮޑުތަކުރުފާނު މަގު ތަރައްގީކުރުމުގެ މަޝްރޫއަށް މާލެ ސިޓީ ކައުންސިލުން ހުރަސްއަޅާފައިވާ ކަމަށް މިނިސްޓަރު ތުހުމަތު ކުރެއްވިއެވެ.
މަގުގެ އުތުރު ފަރާތުގައި ހުރި މާރުކޭޓެއް ނަގައިދޭން އެދި އެތައް ސިޓީއެއް ފޮނުވުމުން ވެސް އެކަން ކޮށްދީފައި ނުވާތީ، އެ ސަރަހައްދުގެ މަގު ހަދަން ޖެހުނީ ދުވާރު ނުލައި ކަމަށް މިނިސްޓަރު ވިދާޅުވިއެވެ.
މީގެ އިތުރުން، މާރުކޭޓު ތަރައްގީކުރުމާ ގުޅޭގޮތުން ފޮނުވި ސިޓީއަށް ވެސް ކައުންސިލުން ޖަވާބު ދީފައި ނުވާކަން އޭނާ ފާހަގަކުރެއްވިއެވެ.
ކިޔުންތެރިންގެ ހިޔާލު