މާލޭގެ ސުނާމީ ބިނާ ސަރަހައްދު މަރާމާތުކޮށް، އެ ސަރަހައްދު އިތުރަށް ތަރައްގީކުރުމަށް އެމްޓީސީސީން ކުރިއަށްގެންދިޔަ މަޝްރޫއު ނިންމާލައިފިއެވެ.
އެ ސަރަހައްދުގެ ތޮށިގަނޑު ގިރަމުންދާތީ، ބާވެފައިވާ ޝީޓް ޕައިލްތައް ނަގައި، 75 މީޓަރުގެ ސަރަހައްދެއްގައި އަލުން ޝީޓް ޕައިލް ޖަހައި ވަނީ ވަރުގަދަކޮށްފައެވެ. އެ ސަރަހައްދުގެ އެއްގަމު ތޮށީގެ މަރާމާތުތައް ވަނީ އެއްކޮށް ނިންމާލާފައެވެ.
އެ ސަރަހައްދަކީ ކުޑަކުދިން ގިނައިން ޒިޔާރަތްކުރާ ތަނަކަށް ވާތީ، ރައްކާތެރިކަމުގެ ފިޔަވަޅެއްގެ ގޮތުން ވަނީ ފެންސެއް ޖަހާފައެވެ. ސުނާމީ ބިނާ ވަނީ ކުރިން ހުރި ތަނުން އެ ސަރަހައްދުގެ އެހެން ދިމާލަކަށް ބަދަލުކޮށްފައެވެ.
ހިނގާ މަގުތަކުގައި މީހުން އިށީނދެލައިގެން ތިބުމަށް އިތުރު ބެންޗުތައް ވަނީ ބަހައްޓާފައެވެ. އެ ސަރަހައްދުގެ ހިތްގައިމުކަން އިތުރުކުރުމަށްޓަކައި ގިނަ އަދަދެއްގެ ގަސް އިންދައި، އިތުރަށް ފެހިކޮށްފައިވެއެވެ.
މި މަސައްކަތަކީ މާލޭގެ ޕާކުތަކާއި އާންމު ހުސްޖާގަތައް ތަރައްގީކުރުމަށް ސަރުކާރުން ކުރިއަށްގެންދާ މަސައްކަތުގެ ބައެކެވެ. މި މަޝްރޫއުގެ އިތުރުން، ސަލްޓަން ޕާކާއި، ޖުމްހޫރީ މައިދާން އަދި ރަސްފަންނު ސަރަހައްދު ތަރައްގީކުރުމުގެ މަސައްކަތްތައް ވެސް ސަރުކާރުން ދަނީ ކުރަމުންނެވެ.
ކިޔުންތެރިންގެ ހިޔާލު