ވީނުވީ ނޭނގި ގެއްލިފައިވާ ބިދޭސީއެއްގެ މައްސަލާގައި ދައުލަތުން ދައުވާކުރި ގދ. ތިނަދޫ، މަނާރު، މުހައްމަދު ނިޒާމްގެ މައްޗަށް މަރުގެ ކުށް ސާބިތުވާ ކަމަށް ކްރިމިނަލް ކޯޓުން މިއަދު ހުކުމްކޮށްފިއެވެ.
ބަންގްލަދޭޝްގެ ރައްޔިތެއް ކަމަށްވާ ލިޓަން ގެއްލުނީ ޑިސެމްބަރު، 2022 ގައި ވިލިމާލެއިން ފުރިފަހުންނެވެ. ދައުލަތުން ކުރި ދައުވާގައިވާގޮތުން ނިޒާމް ވަނީ ލިޓަން ކަނޑަށް ވައްޓާލައި މަރާލާފައެވެ.
ކްރިމިނަލް ކޯޓުން މިއަދު ވަނީ ދައުލަތުން ނިޒާމްގެ މައްޗަށް ކުރި ދައުވާ ސާބިތުވާ ކަމަށް ކަނޑައަޅާފައެވެ. އެ މައްސަލައިގެ އަދަބު ކަނޑައެޅުން އެހެން ދުވަހަކަށް ވަނީ ފަސްކޮށްފައެވެ.
މީގެއިތުރުން ލިޓަން މަރާލުމަށްފަހު އޭނާގެ ފައިސާ ވަގަށް ނެގި ކަމުގެ ދައުވާ ވެސް ދައުލަތުން ކުރިއެވެ. އަދި އެ ދައުވާ ވެސް ސާބިތުވާ ކަމަށް ވަނީ ކަނޑައަޅާފައެވެ.
ނިޒާމް ހައްޔަރުކުރީ އެ ހާދިސާއަށްފަހު ލިޓަން އާއި ނިޒާމް ގެއްލިގެން ހޯދަނިކޮށް މާލެއިންނެވެ. ނިޒާމް މާލެއިން ފެނުމުންނެވެ. ނިޒާމް ތަހުގީގުގައި ވަނީ ކުށަށް އިއުތިރާފްވެފައެވެ.
ކިޔުންތެރިންގެ ހިޔާލު