އެމްޑީޕީގެ ލީގަލް ޑިރެކްޓަރުގެ މަގާމުން އަހުމަދު މައުރޫފް މިއަދު ވަކިކޮށްފިއެވެ.

އެ ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ (ގަޕޯ) ސޮއި ކުރައްވައި މައުރޫފަށް ފޮނުވި ސިޓީއެއްގައި ވަނީ ލީގަލް ޑިރެކްޓަރުގެ މަގާމުން މިއަދުން ފެށިގެން މައުރޫފް ވަކިކޮށްފައިވާ ކަމަށެވެ.

މައުރޫފް މަގާމުން ވަކިކުރި ސަބަބެއް އެ ސިޓީގައި ފާހަގަކޮށްފައެއްނުވެއެވެ.

މައުރޫފަކީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ރައީސް އޮފީހުގެ ލީގަލް ޑިޕާޓްމަންޓުގައި ވެސް މަސައްކަތް ކުރެއްވި ބޭފުޅެކެވެ.

އޭނާ ވަކިކޮށްފައި މިވަނީ ކުރީގެ ރައީސް މުހައްމަދު ނަޝީދު ފެކްޝަނާއި ކުރީގެ ރައީސް އިބްރާހީމް މުހައްމަދު ސޯލިހުގެ ފެކްޝަނާ ދެމެދު ބޮޑެތި ކޯޅުންތަކެއް ހިނގަމުން އަންނަ ދަނޑިވަޅެއްގައެވެ.

ލޯކަލް ކައުންސިލްތަކުގެ އިންތިހާބުގައި އެމްޑީޕީ އަށް ލިބުނު ކާމިޔާބީ ފާހަގަކުރަން ރޭ ބޭއްވި ޖަލްސާގައި ނަޝީދަށް ވާހަކަފުޅު ދައްކަވަން ފުރުސަތު ނުދިން މައްސަލާގައި ސޯޝަލް މީޑިއާގައި މައުރޫފް ވަނީ ޕޯސްޓެއް ވެސް ކުރައްވައިފަ އެވެ.

އޭނާ ވިދާޅުވީ ބޮޑަކަމަކީ ނާކާމިޔާބީ އަށް މަގުފަހިވާ ކަމެއް ކަމަށާއި މަޑުމައިތިރިކަން އިސްކޮށް، މީހުންނަށް ޝުކުރުވެރިވުމާއި އުއްމީދު ދީ، މަގު ދައްކައިދޭންޖޭހެ ކަމަށެވެ.