ދައުލަތުގެ ބަޖެޓުން އެންމެ ބޮޑު ހޭދައެއް ކުރަމުން އަންނަ އާސަންދަ އާއި ސަބްސިޑީއަށް މިއަހަރު ކުރި ހަރަދު، މިދިޔަ އަހަރާ އަޅައިބަލާއިރު 249.7 މިލިއަން ރުފިޔާ ދަށްވެއްޖެއެވެ.
ފިނޭންސް މިނިސްޓްރީން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން، މި މަހުގެ 19 ވަނަ ދުވަހާ ހަމައަށް އާސަންދައަށް ހޭދަކޮށްފައިވަނީ 413.3 މިލިއަން ރުފިޔާއެވެ. މިއީ މިދިޔަ އަހަރުގެ މި މުއްދަތުގައި ހޭދަކުރި 602.4 މިލިއަން ރުފިޔާއާ އަޅައިބަލާއިރު 189.1 މިލިއަން ރުފިޔާގެ ބޮޑު ދަށްވުމެކެވެ. މީގެ އިތުރުން، ބަލި މީހުންނަށް އެހީވުމުގެ ގޮތުން ދޭ މެޑިކަލް ވެލްފެއާއަށް ކުރި ހަރަދުވެސް ވަނީ 69.1 މިލިއަން ރުފިޔާއިން 37.3 މިލިއަން ރުފިޔާއަށް ދަށްވެފައެވެ. އެހެންކަމުން މިއީ ވެސް 31.8 މިލިއަން ރުފިޔާގެ ކުޑަވުމެކެވެ.
ރައްޔިތުންނަށް ދޭ އެކިކަހަލަ ސަބްސިޑީތަކަށް ދައުލަތުން ކުރާ ހޭދައަށް ބަލާއިރު، މިއަހަރުގެ މާރިޗު މަހުގެ 19 ގެ ނިޔަލަށް އެކަމަށް ހޭދަވެފައިވަނީ 758.3 މިލިއަން ރުފިޔާއެވެ. ނަމަވެސް މިދިޔަ އަހަރުގެ މި މުއްދަތުގައި ސަބްސިޑީއަށް 818.9 މިލިއަން ރުފިޔާ ހަރަދުކޮށްފައިވެއެވެ. އެހެންކަމުން، ސަބްސިޑީއަށް ކުރި ހޭދައިން އެކަނިވެސް މިއަހަރު ވަނީ 60.6 މިލިއަން ރުފިޔާ ސަލާމަތްކުރެވިފައެވެ. މި ބަދަލުތަކާއެކު ދައުލަތުގެ މައިގަނޑު ހަރަދުތައް ކުޑަކުރެވިފައިވާކަން މިނިސްޓްރީގެ ރިޕޯޓުން ސާފުކޮށް ފެންނަން އެބަހުއްޓެވެ.
ކިޔުންތެރިންގެ ހިޔާލު