އީރާނުގެ ހަމަލާތަކުން ބަހްރެއިން ދިފާއުކުރަން ގޮސްހުރި ޔުނައިޓެޑް އަރަބް އެމިރޭޓްސްގެ ސިފައިންގެ މީހަކު މަރުވެއްޖެއެވެ.
ބަހްރެއިން ޑިފެންސް މިނިސްޓްރީން ބުނެފައިވަނީ، ޔޫއޭއީގެ ސިފައިންގެ މީހާ މަރުވެފައިވަނީ އީރާނުން ދިން ހަމަލާއެއްގައި ކަމަށެވެ. މި ހަމަލާގައި ބަހްރެއިން ސިފައިންގެ އެތައް ބަޔަކު ޒަޚަމްވި ކަމަށްވެސް ބުނެފައި ވެއެވެ.
މިކަމާ ގުޅޭގޮތުން ޔޫއޭއީގެ މިނިސްޓްރީ އޮފް ޑިފެންސުން ނެރުނު ބަޔާނުގައި ބުނެފައިވަނީ، އީރާނުގެ ބެލިސްޓިކް މިސައިލް ހަމަލާއެއްގައި މަރުވެފައިވަނީ ޔޫއޭއީ އަސްކަރިއްޔާގެ ސިވިލް ކޮންޓްރެކްޓަރެއް ކަމަށާއި، އެއީ މޮރޮކޯގެ ރައްޔިތެއް ކަމަށެވެ. މި ހަމަލާގައި ޔޫއޭއީ ސިފައިންގެ އިތުރު 5 މީހުން ޒަޚަމްވި ކަމަށްވެސް ބުނެފައި ވެއެވެ.
އީރާނުގެ ހަމަލާތަކުން ބަހްރެއިން ދިފާއުކުރަން، ޔޫއޭއީއާއި އަދި އަވަށްޓެރި އެހެން ގައުމެއްގެ ސިފައިން ބަހްރެއިންގައި ދަނީ ހަރަކާތްތެރިވަމުންނެވެ.
އެމީހުންގެ ކަމަކީ، އެމެރިކާ ސިފައިންނާއި، ބަހްރެއިން ސިފައިންނާ ގުޅިގެން އީރާނުން ފޮނުވާލާ މިސައިލްތަކާއި ޑްރޯންތައް ވައްޓާލުމެވެ.
އީރާނުން މިހާރުވެސް ގެންދަނީ ކޮންމެ ދުވަހަކު ބަހްރެއިންގައި ގާއިމްކޮށްފައިވާ އެމެރިކާގެ އަސްކަރީ ބޭސްތަކަށާއި، އެމެރިކާ ސިފައިންގެ ތަންތަނަށް ހަމަލާތައް ދެމުންނެވެ.
އީރާނުގެ ހަމަލާތަކުގައި ބަހްރެއިންގެ ކިންގް އީސާ އެއަރ ބޭސްއަށް ބޮޑެތި ގެއްލުންތައް ދީފައިވާއިރު، ރިފާ އެއަރ ބޭސްގައި ގާއިމްކޮށްފައިވާ އެއަރ ޑިފެންސް ސިސްޓަމްވެސް ވަނީ ފުނޑާލާފައެވެ.
އީރާނުގެ ހަމަލާތަކުގައި އެމެރިކާ ސިފައިންނާ ގުޅުންހުރި އެހެން ތަންތަނަށްވެސް ބޮޑެތި ގެއްލުންތައް ދީފައި ވެއެވެ. އެތައް ތަނެއްގައި އަލިފާން ރޯވެ އަނދާފައި ވެއެވެ.
ބަހްރެއިންއަކީ އެމެރިކާގެ ކަނޑުގެ ސިފައިންގެ ފިފްތު ފްލީޓްގެ ކޮމާންޑް ސެންޓަރު ގާއިމްކޮށްފައިވާ ގައުމުވެސް މެއެވެ.
އީރާނުގެ ހަމަލާތަކުގެ ސަބަބުން ބަހްރެއިންގެ އެމެޒަން ސާވަރ މައްސަލަޖެހި މަސައްކަތް ހުއްޓިފައި ވެއެވެ. އީރާނުން ހަމަލާ ދީފައިވަނީ ބަހްރެއިންގެ އެމެޒަން ވެބް ސަރވިސް އިމާރާތަށެވެ.
ކިޔުންތެރިންގެ ހިޔާލު