އީރާނާ ދެކޮޅަށް އެމެރިކާއިން ފަށާފައިވާ ހަނގުރާމައާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕް އަނެއްކާވެސް އައު ވާހަކަތަކެއް ދައްކައިފިއެވެ.
ޓްރަމްޕްގެ އަމިއްލަ ޓުރުތު ސޯޝަލްގައި ޕޯސްޓްކުރި ބަޔާނެއްގައި ބުނެފައިވަނީ، އީރާނާ ދެކޮޅަށް އެމެރިކާއިން ކުރަމުންދާ ހަނގުރާމަ ހުއްޓުމަކަށް ގެނައުމަށް ވިސްނަމުން ގެންދާ ކަމަށެވެ.
ޓްރަމްޕް ބުނެފައިވަނީ، އެމެރިކާއިން އީރާނަށް ހަމަލާ ދެމުންގެންދާ މަގްސަދު ހާސިލްވުމާ ވަރަށް ގާތަށް ދެވިފައިވާ ކަމަށާއި، އެހެންކަމުން، ހަމަލާތައް މަޑުޖައްސަމުންގޮސް ހުއްޓުމަކަށް ގެނައުމަށް މިހާރު ވިސްނަމުން ގެންދާ ކަމަށެވެ.
ޓްރަމްޕްގެ ބަޔާނުގައި، އެމެރިކާއަކީ ހޮރްމޫޒް ކަނޑުއޮޅި ބޭނުންކުރާ ގައުމެއް ނޫން ކަމަށް ބުނެފައި ވެއެވެ. އަދި އޭނާ ގަބޫލުކުރާ ގޮތުގައި ހޮރްމޫޒް ގާޑުކޮށް ބެލެހެއްޓުމަކީ އެ ކަނޑުއޮޅި ބޭނުންކުރާ ގައުމުތަކުގެ ޒިންމާއެއް ކަމަށް ދެކޭ ކަމަށްވެސް ބުނެފައި ވެއެވެ.
ގައުމުތަކުން އެދިއްޖެނަމަ ހޮރްމޫޒު ބެލެހެއްޓުމުގައި އެމެރިކާއިން އެހީތެރިވާނޭ ކަމަށާއި، އެކަމަކު، އީރާނުގެ ފަރާތުން ހޮރްމޫޒަށް ކުރިމަތިވާ ނުރައްކާތައް ނައްތާލެވުމުން އެ ކަނޑުއޮޅި ބެލެހެއްޓުމުގެ ބޭނުމެއް ނޯންނާނެ ކަމަށްވެސް ޓްރަމްޕް ބުނެފައި ވެއެވެ.
ރިޕޯޓްތައް ބުނާގޮތުގައި، އެމެރިކާއިން މިހާރު ގެންދަނީ ހޮރްމޫޒު ކަނޑުއޮޅީގެ ކޮންޓްރޯލް ނަގާނެ ގޮތެއް ރާވައި، އެކަން ތަންފީޒު ކުރުމަށް ތައްޔާރުވަމުންނެވެ. އެމެރިކާއިން ސަރަހައްދަށް އިތުރު އެތައްހާސް ސިފައިންނާއި ހަތިޔާރު ޖަމާކުރަމުން ގެންދަނީވެސް އެ ބޭނުމުގައި ކަމަށާއި، ބޮޑުކަމެއް ވަރަށް އަވަހަށް ހިނގާން އުޅޭކަމުގެ ނިޝާންތައް ފެންނަމުންދާ ކަމަށް ޚަބަރުތައް ބުނެއެވެ.
އީރާނަށް ހަމަލާދީ ހޮރްމޫޒުގެ ކޮންޓްރޯލް އެމެރިކާއިން ނަގާނޭގޮތެއް އަދި ނޭނގެއެވެ. ކުރިން ފޮނުވި އެމެރިކާ ސިފައިންނަށް ހޮރްމޫޒާ ގާތަށްވެސް ނުދެވުނެވެ.
ހޮރްމޫޒު ކަނޑުއޮޅި ހިފުމަށް އެމެރިކާގެ ރައީސް ޓްރަމްޕް، މަނަވަރުތައް ފޮނުވައިގެންދޭން އެމެރިކާގެ ބައިވެރިންނަށް ގޮވާލުމުން ގައުމުތަކުން އެދެވޭ އިޖާބައެއް ދީފައި ނުވާތީ ޓްރަމްޕް ވަނީ ވަރަށް ބޮޑަށް ނުރުހުންވެސް ވެފައެވެ.
ނޭޓޯއިންވެސް ޓްރަމްޕްގެ ގޮވާލުމަށް އިޖާބަ ނުދިނުމުން ނޭޓޯއަށް ނިސްބަތްކޮށް ޓްރަމްޕް ބުނެފައިވަނީ، ނޭޓޯއަކީ “ފިނޑިބައެއް” ކަމަށެވެ.
ކިޔުންތެރިންގެ ހިޔާލު