ބ. ދަރަވަންދޫ އެއާޕޯޓުގެ ރަންވޭ ބޮޑުކުރުމަށް ބިން ހިއްކުމުގެ މަސައްކަތް ކުރިއަށްދާ ކަމަށް ބުނެ ބައެއް މީޑިއާތަކުގައި ފެތުރެމުންދާ ވާހަކަތަކަކީ ހަގީގަތާ ހިލާފު ދޮގު ވާހަކަތަކެއް ކަމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އެވިއޭޝަނުން ބުނެފިއެވެ.
މިހާރު ދެކެވެމުންދާ ވާހަކަތަކާ ހިލާފަށް، ދަރަވަންދޫ އެއާޕޯޓުގެ ރަންވޭ ދިގުކުރުމަށް ބިން ހިއްކުމުގެ އެއްވެސް މަޝްރޫއެއް މިވަގުތު ރޭވިފައި ނެތްކަން އެ މިނިސްޓްރީން ހާމަކުރެއެވެ.
ދަރަވަންދޫ އެއާޕޯޓާ ގުޅޭގޮތުން ސަރުކާރުން މިހާރު އެންމެ ބޮޑު އިސްކަމެއް ދެނީ އެއާޕޯޓުގައި މިހާރު ހުރި ވަސީލަތްތައް ތަރައްގީކޮށް، ޓާމިނަލްގެ އިންފްރާސްޓްރަކްޗާ އިތުރަށް ފުރިހަމަކުރުމަށެވެ. މި މަސައްކަތްތަކުގެ މައިގަނޑު މަގުސަދުތަކަކީ ފަސިންޖަރުންނަށް ލިބޭ ހިދުމަތްތައް ރަނގަޅުކުރުމާއި، އެއާޕޯޓް ހިންގުމުގެ ދުވެލި ހަލުވިކުރުމާއި، ހިދުމަތުގެ ފެންވަރު މަތިކުރުމުގެ އިތުރުން މިހާރު ހުރި ވަސީލަތްތަކުގެ ބޭނުން އެންމެ ފުރިހަމަ ގޮތުގައި ހިފުމެވެ.
އެހެންކަމުން، ރަންވޭ ބޮޑުކުރުމަށް ބިން ހިއްކުމުގެ މަސައްކަތް ފަށާފައިވާކަމަށް ނުވަތަ އެފަދަ ކަމަކަށް ހުއްދަ ދީފައިވާ ކަމަށް ދެކެވޭ ވާހަކަތަކަކީ އެއްވެސް އަސާސެއް ނެތް ވާހަކަތަކެއްކަމަށް އެ މިނިސްޓްރީން ބުންޏެވެ.
އާންމުންގެ މެދުގައި އޮޅުންބޮޅުން އުފެދިދާނެ ފަދަ ސައްހަ ނޫން މައުލޫމާތު ފެތުރުމުގެ ބަދަލުގައި، ސަރުކާރުގެ ރަސްމީ އިދާރާތަކުން މައުލޫމާތު ސާފުކުރުމަށް މީޑިއާތަކަށާއި އާންމުންނަށް މިނިސްޓްރީން އިލްތިމާސްކުރެއެވެ.
ރައްޔިތުންގެ ބޭނުންތަކާ އެއްގޮތަށް، ދެފުށް ފެންނަ ގޮތެއްގައި އިންފްރާސްޓްރަކްޗާ ތަރައްގީކުރުމަށް ސަރުކާރުން އަބަދުވެސް މަސައްކަތް ކުރާނެއެވެ.
މިކަމާ ގުޅޭ ސައްހަ މައުލޫމާތު ހޯދުމަށްޓަކައި މިނިސްޓްރީ އޮފް ޓްރާންސްޕޯޓް އެންޑް ސިވިލް އެވިއޭޝަނުން ނެރޭ ރަސްމީ ބަޔާންތަކަށް ބަރޯސާވުމަށް އެދިފައިވެއެވެ.