ތިނަދޫ ސިޓީ ކައުންސިލަށް ބަދަލެއް ބޭނުންވާ ކަމަށާއި މާޒީއަށް ވިސްނުމަށްފަހު ރަށަށް ހެޔޮ ބަދަލެއް ގެންނަން ޖެހޭ ކަމަށް ޕީއެންސީގެ ފަރާތުން ތިނަދޫ ސިޓީގެ މޭޔަރު ކަމަށް ކުރިމަތިލައްވާ ކެންޑިޑޭޓް މުހައްމަދު އަޖީބް ވިދާޅުވެއްޖެއެވެ.

ތިނަދޫ ސިޓީގެ މާލޭ ސަރަހައްދުގެ ކެމްޕެއިން އޮފީސް ހުޅުވުމުގެ ރަސްމިއްޔާތުގައި ވާހަކަދައްކަވަމުން އަޖީބް ވިދާޅުވީ މާޒީއަށް ވިސްނުމަށް ފަހު ތިނަދޫ ސިޓީއަށް ގެންނަންޖެހޭނީ ހެޔޮ ބަދަލެއް ކަމަށެވެ.

“އެ ބަދަލު ވެގެންނުވާނެ މާޒީ އިޔާދަވެގެންދާނެ ބަދަލަކަށް. ތަފާތު ބަދަލަކަށް ވާންޖެހޭނެ. މީގެކުރިން ތިނަދޫގައި ތަކުރާރުވަމުން އައިސްފައި އޮތް ނޭއްގާނީކަން ތިނަދޫ ސިޓީގެ ކައުންސިލުން އެބަޖެހޭ ބަދަލުކުރަން. މިހާރު އޮތް ކައުންސިލުން ގަބޫލުކުރަނީ މީގެކުރިން ރާއްޖޭގައި ހެދިފައިނުވާ އަމިއްލަ ގާނޫނަކާއި ގަވައިދެއް. އަދި ސަރުކާރުގެ މުވައްސަސާތަކަށްވެސް މިހާރު އޮތް ކައުންސިލުން އެއްބާރުލުން ނުދޭ.” އަޖީބު ވިދާޅުވިއެވެ.

މޭޔަރު ކަމަށް އިންތިހާބުވެއްޖެނަމަ، ތިނަދޫ ސިޓީއަކީ އިގްތިސާދީ ގޮތުން ބާރުވެރި ތަނަކަށް ހައްދަވާނެކަމަށް ވެސް އަޖީބު ވިދާޅުވިއެވެ.

މީގެއިތުރުން ތިނަދޫގެ ރައްޔިތުންނަށް އާމްދަނީ ލިބޭނެ ގޮތްތަކެއް ވެސް ފަހިކޮށްދެއްވާނެ ކަމަށް އަޖީބު ވިދާޅުވިއެވެ.