ލ. އަތޮޅުގައި ދެވަނަ އެއާޕޯޓް ހަދާނެ ރަށް ވަރަށް އަވަހަށް ކަނޑައަޅުއްވާނެކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް މުއިއްޒު، ލ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން މިއަދު އެ އަތޮޅު މާވަށަށް ވަޑައިގެން ރަށުގެ ރައްޔިތުންނާ ބައްދަލުކުރެއްވައި ވިދާޅުވީ، އެއާޕޯޓް ހަދާނީ އިގްތިސޯދީ ގޮތުންނާއި ފަތުރުވެރިކަމަށް އެކަށޭނެ ހިސާބެއްގައި ކަމަށެވެ.

“ދެން އަންނަން ޖެހޭ އެއާޕޯޓް އަންނަން ޖެހޭނީ ދުރު ރާސްތާއަށް ވެސް ވިސްނާއިރު، އިގްތިސޯދީ ގޮތުންވެސް ދެމެހެއްޓެނިވި ތަރައްގީއެއް ހާސިލުވާނެ ގޮތަކަށް. ޓޫރިޒަމްގެ ކުރިއެރުމަށް ބަލާއިރުގައިވެސް އެންމެ ރަނގަޅު ގޮތުގައި، ގިނަ ރިސޯޓުތަކެއް ތަރައްގީ ކުރެވެން އޮތް ހިސާބެއްގައި އޮތް ރަށެއްގެ ކައިރީގައި އެއާޕޯޓް އަޅަން ޖެހޭނީ. އަދި ޖިއޮގްރަފިކަލީ ބަލާއިރުގައިވެސް އެއާޕޯޓެއް އޮންނަން ޖެހޭނެ ރަށެއްގައި އެއާޕޯޓް އަޅަން ޖެހޭނީ.” ރައީސް

“އަޅުގަނޑުގެ ވިސްނުން ހުރިގޮތް މިއީ. މި އަތޮޅުގައި ދެވަނަ އެއާޕޯޓް އެޅެން ޖެހޭނެ. އެއީ ޓޫރިޒަމް ކުރިއެރުމާއި، ދަތުރުފަތުރުކުރުމާއި، މި ހުރިހާ ކަމަކަށް ބަލާއިރުގައިވެސް، އެ ނީޑް އޮތް، އެ ޕޮޓެންޝަލް އޮތް، އެ އުންމީދު، ނޫނީވިއްޔާ އެ މުސްތަގުބަލް އޮތް ހިސާބެއްގައި.”

ރައީސް ވިދާޅުވީ މާވަށުގައި ސަރުކާރުން ކުރިއަށްގެންދަން ނިންމި 11 މަޝްރޫއުގެ މަސައްކަތް ވަރަށް ބާރު މިނެއްގައި ކުރިއަށް ގެންގޮސް ވަރަށް އަވަހަށް ނިންމައިދޭނެ ކަމަށެވެ.