ޕަބްލިކް ސާވިސް މީޑިއާ (ޕީއެސްއެމް) އިން ކުޅުދުއްފުށި ސިޓީގައި ކުރިއަށްގެންދާ ބޭސިކް މީޑިއާ ސްކިލްސް ވޯކްޝޮޕްގައި ބައިވެރިވުމުގެ ފުރުސަތު ހުޅުވާލައިފިއެވެ.
މި ސެޕްޓެމްބަރ މަހު 24 އިން އޮކްޓޫބަރު މަހުގެ 3 އަށް ކުރިއަށްގެންދާ މި ވޯކްޝޮޕަކީ، ޕަބްލިކް ސާރވިސް މީޑިއާގެ ދަށުން ހިންގާ މޯލްޑިވްސް މީޑިއާ އިންސްޓިޓިއުޓުން މީޑިއާގެ ދާއިރާއަށް މީހުން ބިނާކޮށް މިދާއިރާގައި މަސައްކަތްކުރާނެ މީހުން އުފެއްދުމަށް އަތޮޅުތެރެއަށް އަމާޒުކޮށްގެން ކުރިއަށްގެންދާ ބޭސިކް މީޑިއާ ސްކިލްސް ވޯކްޝޮޕެކެވެ.
މި ވޯކްޝޮޕުގައި ބައިވެރިވުމަށް ހުޅުވާލަމުން ޕީއެސްއެމް އިން އާންމުކޮށްފައިވާ އިއުލާނުގައި ބުނެފައިވަނީ މި ވޯކްޝޮޕްގައި ނޫސްވެރިކަމާއި، ކެމެރާކުރުމާއި، ވީޑިއޯ އެޑިޓްކުރުމުގެ އިތުރުން، ޚަބަރާއި ޕްރޮގްރާމް ހުށަހަޅައިދިނުމުގެ ދާއިރާއިން މީހުން ތަމްރީންކޮށް، އެ ދާއިރާތަކުން ކުރިއަށްދިއުމުގެ ފުރުޞަތު ފަހިކޮށްދެވޭނެކަމަށެވެ.
މިގޮތުން، މި ބޭސިކް މީޑިއާ ސްކިލްސް ވޯކްޝޮޕްގައި ބައިވެރިވާން ޝައުޤުވެރިވާ ފަރާތްތަކުން މިސެޕްޓެމްބަރު މަހުގެ 22 ވަނަ ދުވަހުގެ 14:00 ގެ ކުރިން އެ އިންސްޓިޓިއުޓްގެ އީމެއިލް، [email protected] އަށް އައިޑީކާޑުގެ ދެފުށުގެ ސާފު ކޮޕީ ނުވަތަ، https://forms.gle/kR1256jrgRcxQ2Cy8 އެޕްލިކޭޝަން ފޯމް މެދުވެރިކޮށް ރަޖިސްޓްރީވުމަށް އެދިފައިވެއެވެ.
މީގެ އިތުރުން ޕީއެސްއެމް އިން ވަނީ މި ވޯކްޝޮޕާއި ގުޅޭގޮތުން އިތުރު މައުލޫމާތު ސާފުކުރުމަށް އެމް.އެމް.އައިގެ ނަންބަރު، 3000340 އަށް ގުޅުމަށް އިލްތިމާސްކޮށްފައެވެ.
ކިޔުންތެރިންގެ ހިޔާލު