ހުޅުމާލޭ ފޭސް 2، ހިޔާ ފްލެޓެއްގެ ބޭސްމަންޓުން ސައިކަލެއް ވަގަށް ނެގި މީހަކު ޖަލަށްލާން ހުކުމްކޮށްފިއެވެ.
ހުޅުމާލެ، ފޭސް 2، ހިޔާ ޓަވަރު 11 ގެ ބޭސްމަންޓުން ސައިކަލެއް ވަގަށް ނެގި މައްސަލައިގައި ޖަލު ހުކުމެއް އިއްވާފައިވަނީ، ސ،. ހިތަދޫ ތޫނުފިލިގޭ މުހައްމަދު ޝަފީއުގެ މައްޗަށެވެ. އޭނާ އަކީ ކުށުގެ ރެކޯޑު އޮންނަ މީހެކެވެ.
ދައުލަތުން ކުރި ދައުވާ ސާބިތުވުމުން ކްރިމިނަލް ކޯޓުން އޭނާގެ މައްޗަށް އިއްވީ އެއް އަހަރާއި 12 ދުވަހުގެ ޖަލު ހުކުމެކެވެ. އެކަމަކު، ކުރިން ބަންދު ކުރި 15 ދުވަސް އުނިކުރުމުން، އޭނާ ދެން ތަންފީޒު ކުރަންޖެހޭނީ، 11 މަހާއި 26 ދުވަހުގެ ޖަލު ހުކުމެއް ކަމަށް އެ ހުކުމްގައިވެ އެވެ.
ލ. އަތޮޅު މީހެއްގެ މި ސައިކަލު، ހިޔާ ޓަވަރުގެ ބޭސްމަންޓުން ގެއްލިފައިވަނިކޮށް، މި ސައިކަލު ފެނުނީ ސައިކަލު ގެއްލުނުތާ ތިން ދުވަސް ފަހުން މާލެއިންނެވެ. ސައިކަލު ފެނުނީ، ޝަފީއު އެ ސައިކަލުގައި އިންދައެވެ.
މި މައްސަލައިގެ ޝަރީއަތުގައި ޝަފީއުވަނީ އޭނާ އެ ސައިކަލު ނެގި ކަމަށް އިއުތިރާފުވެފައެވެ. ޝަރީއަތުގައި އޭނާ އިއުތިރާފުވިނަމަވެސް، ރެކޯޑްތަކުން ދައްކާ ގޮތުގައި ސައިކަލު ފެނިގެން ފުރަތަމަ ޝަފީއު ހައްޔަރު ކުރުމުން އޭނާ ބުނެފައިވަނީ ސައިކަލަކީ ރައްޓެއްސަކު އޭނާ އަތަށް ދިން ސައިކަލެއް ކަމަށެވެ. ޝަފީއު އެހެން ބުނެފައިވަނީ އޭރު އޭނާ ހައްޔަރުކޮށްގެން ކޯޓަށް ހާޒިރު ކުރުމުން ބަންދު މަޖިލީހުގައެވެ.
ކިޔުންތެރިންގެ ހިޔާލު