ރާއްޖެއަށް އައި އިރު ޕެޑެއްގެ ތެރޭގައި މަސްތުވާތަކެތި ފޮރުވައިގެން ގެނައި މައްސަލައިގައި ހައްޔަރުކުރި މީހުންނަށް ޓިކެޓް ގަނެދިން މީހާ، އެކަން ކުރީ ކްރެޑިޓް ކާޑަށް ޕޮއިންޓް ހޯދަން ކަމަށް ކޯޓުގައި ބުނެފިއެވެ.
މި މައްސަލައިގެ ތުހުމަތުގައި ހައްޔަރުކޮށްފައިވަނީ މ. ލިއޯނިސް، އުމުރުން 32 އަހަރުގެ އަބްދުﷲ ތޯއިފް އަދި މއ. މޯނިން ވިއު، އުމުރުން 32 އަހަރުގެ އާމިނަތު ޝަފަގު އެވެ. ތޯއިފްގެ ބަންދާމެދު ގޮތެއް ނިންމުމަށް އިއްޔެ ކޯޓަށް ހާޒިރުކުރުމުން ވަނީ އޭނާގެ ބަންދަށް 30 ދުވަސް ދީފައެވެ.
ކޯޓު އަމުރުގައިވާ ގޮތުން، ތޯއިފްގެ ފަރާތުން ބުނެފައިވަނީ މައްސަލައިގައި ހިމެނޭ މީހުންގެ ޓިކެޓް އޭނާގެ ކްރެޑިޓް ކާޑުން ގަނެދިނީ އެހެން މީހަކު ބުނެގެންނާއި، އަދި އޭނާ ވެސް ކާޑަށް ޕޮއިންޓު ހޯދަން ބޭނުންވެގެން ކަމަށެވެ. ނަމަވެސް އެއީ ކާކު ބުނެގެން ނެގި ޓިކެޓެއްކަން އޭނާއަށް ކޯޓުގައި ބުނެދެވިފައެއް ނުވެއެވެ.
މަސްތުވާތަކެތި ގެނައި މީހާއާ ހަވާލުވަނީ ކާކުތޯ ބެލުމަށް ފުލުހުން ހިންގި ކޮންޓްރޯލް ޑެލިވަރީ އޮޕަރޭޝަންގައި އެ ތަކެއްޗާ ހަވާލުވީ ވެސް ތޯއިފް ކަމަށް އަމުރުގައި ބަޔާންކޮށްފައިވެއެވެ. ނަމަވެސް އެކަން އެހެން މެދުވެރިވި ސަބަބުވެސް އޭނާއަށް ސާފުކޮށްދެވިފައެއް ނުވެއެވެ.
މި މައްސަލައިގައި ޕެޑެއްގެ ތެރޭގައި މަސްތުވާތަކެތި ރާއްޖެއަށް އެތެރެކުރުމުގެ ތުހުމަތުގައި ހައްޔަރުކުރި ޝަފަގު މިދިޔަ އޭޕްރީލް މަހުގެ ފަހުކޮޅުން ފެށިގެން ހުރީ ބަންދުގައެވެ. އޭނާ ލައިގެން ހުރި ޖިންސާއި ހަށިގަނޑާ ދޭތެރެއިން ނެގި ދެ ޕެޑެއްގެ ތެރޭގައި ފޮރުވާފައި އޮތް ޕްލާސްޓިކް ކޮތަޅެއްގެ ތެރެއިން، މަސްތުވާތަކެތި ކަމަށް ޝައްކުކުރެވޭ އެއްޗެހި ހުރި 30 ރަބަރު ކޮތަޅު ފެނިފައިވެއެވެ. މަސްތުވާތަކެތީގެ ތަހުލީލީ ނަތީޖާ ދައްކާ ގޮތުން، އެ ތަކެތީގައި 29.19 ގްރާމްގެ ޑައިމޯފިން ހުރިކަން ވަނީ ކަށަވަރުވެފައެވެ.
ކިޔުންތެރިންގެ ހިޔާލު