ނަލަހިޔާ ރެޒިޑެންސްގެ އެޕާޓްމަންޓަކުން ހަތަރު މިލިއަން ރުފިޔާ ވަގަށް ނެގި މައްސަލައިގައި ތުހުމަތުކުރެވޭ ފަސް މީހެއްގެ މައްޗަށް ދައުވާކުރުމަށް ޕްރޮސެކިއުޓާ ޖެނެރަލްގެ އޮފީހުން ކްރިމިނަލް ކޯޓަށް ހުށަހަޅައިފިއެވެ.
މިއަހަރުގެ މާރިޗު މަހުގެ 16 ވަނަ ދުވަހު މަޖީދީމަގުގައި ހުންނަ ނަލަހިޔާ ރެޒިޑެންސްގެ އެޕާޓްމަންޓަކުން ވައްކަން ކޮށްފައިވާ މައްސަލަ ފުލުހުންނަށް ރިޕޯޓުކޮށްފައިވަނީ އެ ދުވަހުގެ ހަވީރު 17:49 ހާއިރުއެވެ. މި ވައްކަމުގައި ޖުމުލަ ހަތަރު މިލިއަން ދިވެހި ރުފިޔާ ވަގަށް ނަގާފައިވާއިރު، އޭގެ ތެރެއިން ފުލުހުންނަށް ހޯދިފައިވަނީ ފަންސާސް ހާސް ރުފިޔާއެވެ.
މި މައްސަލައިގައި ދައުވާކުރުމަށް މިދިޔަ މަހުގެ 25 ވަނަ ދުވަހު ކޯޓަށް ފޮނުވާފައިވަނީ މ. އޭސިޔާ އަޙްމަދު ފާރިސް އާއި، ހދ. ނޮޅިވަރަންފަރު ޖަޒީލާމަންޒިލް ޖަޒީލު މުޙައްމަދު އާއި، ސ. މީދޫ މޫންލައިޓްވިލާ މުޙައްމަދު އަފްރާޙް އާއި، ރ. މަޑުއްވަރި ދާރުލް އައްވަލް އިސްމާޢީލް ޢާޞިފްގެ އިތުރުން ޅ. ނައިފަރު ކަސްތޫރިމާގެ މުޙައްމަދު ނޫރު އަޙްމަދުގެ މައްޗަށެވެ. މި ފަސް މީހުންގެ މައްޗަށް ވެސް އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ދައުވާ އުފުލާފައިވާއިރު، މި ކުށުގެ އަސާސީ އަދަބަކީ ތިން އަހަރާއި ދެ މަހާއި ބާރަ ދުވަހުގެ މުއްދަތަކަށް ޖަލަށްލުމެވެ.
މީގެ އިތުރުން، އަޙްމަދު ފާރިސާއި ޖަޒީލު މުޙައްމަދާއި މުޙައްމަދު ނޫރު އަޙްމަދުގެ މައްޗަށް މުދަލަށް ގެއްލުން ދިނުމުގެ ދައުވާއާއި އެނގިހުރެ ހުއްދަނޫން ތަނަކަށް ވަނުމުގެ ދައުވާ ވެސް ވަނީ އުފުލާފައެވެ. މި ދެ ދައުވާގެ އަސާސީ އަދަބަކީ ހަތަރު މަހާއި ސައުވީސް ދުވަހަށް ޖަލަށްލުމެވެ. ޕްރޮސެކިއުޓާ ޖެނެރަލްގެ އޮފީހުން ވަނީ ވަގަށް ނަގާފައިވާ ފައިސާގެ ތެރެއިން ނުލިބިވާ ފައިސާ، ދައުވާ ލިބޭ މީހުންގެ އަތުން ނަގައިދިނުމަށް ކޯޓުގައި އެދިފައެވެ.
ކިޔުންތެރިންގެ ހިޔާލު