އަދާދެރަނަ ޖަލުގައި ހުންނެވި ސްރީލަންކާގެ ކުރީގެ ރައީސް ރަނިލް ވިކްރަމަސިންހަ، ކޮލަމްބޯ ނޭޝަނަލް ހޮސްޕިޓަލަށް މިއަދު ބަދަލުކޮށްފިއެވެ.
ސްރީލަންކާގެ މީޑިއާތަކުން ބުނީ ރަނިލް ޖަލަށް ބަދަލުކޮށްފައިމިވަނީ ސިއްހީ ހާލަތުހުރިގޮތުން ހޮސްޕިޓަލުގައި އެޑްމިޓްކޮށްގެން ފަރުވާ ދޭންޖެހޭކަމަށް ޑޮކްޓަރުން ލަފާދެއްވުމާ ގުޅިގެންކަމަށެވެ. ހައްޔަރުކުރެއްވުމުގެ ކުރިންވެސް ރަނިލް އަކީ ހަކުރު ބައްޔަށް ފަރުވާ ހޯއްދަވަމުން ގެންދަވާ ބޭފުޅެކެވެ. ރަނިިލް ހައްޔަރުކުރުމަށްފަހު ފަރުވާގެ ކަންކަން ކުރިއަށްގެންދިޔައީ ޖަލުގައި ހުންނަ ސިއްހީ ފަރުވާދޭ ޔުނިތަކުންނެވެ.
ރަނިލް ކޮލަމްބޯ ހޮސްޕިޓަލަށް ބަދަލުކުރެއްވީ ލޭގެ ޕްރެސަރާއި ހަކުރު މިންވަރު މަތިވުމާ ގުޅިގެންނެވެ. ޑޮކްޓަރުންގެ ޓީމުން ވަނީ ރަނިލްގެ ހާލަތަށް ބައްލަވައި ގޭގައި ކައްކައިގެން ކާތަކެތި ހޮސްޕިޓަލަށް ގެނައުމަށް ހުއްދަ ދީފައެވެ.
ރަނިލް ހައްޔަރުކޮށްފައިވަނީ ސްރީލަންކާގެ ބައިތުލްމާލުގެ ފައިސާ ނަހަމަގޮތުގައި ބޭނުންކުރެއްވިކަމުގެ ތުހުމަތުގައެވެ. އެގޮތުން 2023 ވަނަ އަހަރު ރަނިލް އިނގިރޭސިވިލާތަށް ކުރެއްވި ދަތުރުފުޅުގައި ދައުލަތުގެ ފައިސާ އުސޫލުން ބޭރުން އަމިއްލަ ބޭނުންތަކަށް ބޭނުންކުރެއްވިކަމަށް ލަންކާގެ ކަމާބެހޭ އިދާރާތަކުން ބުނެފައިވާކަމަށް އެޤައުމުގެ މީޑިއާތަކުން ވަނީ ރިޕޯޓްކޮށްފައެވެ.
ކިޔުންތެރިންގެ ހިޔާލު