އއ. އުކުޅަހުގައި ގާއިމުކުރި ބޭންކް އޮފް މޯލްޑިވްސް (ބީއެމްއެލް) ގެ ގޮފި ހުޅުވައި، އެރަށުގައި ޑޮލަރު އޭޓީއެމްގެ ޚިދުމަތްދޭން ފަށައިފިއެވެ.
އުކުޅަހުގައި ގާއިމުކުރި ބީއެމްއެލްގެ ގޮފި ހުޅުވައިދެއްވައި، އެރަށުގައި ޑޮލަރު އޭޓީއެމްގެ ޚިދުމަތް ރަސްމީކޮށް ފައްޓަވައިދެއްވީ، އަރިއަތޮޅު އުތުރުބުރީގެ ރަށްތަކަށް ކުރައްވާ ރަސްމީ ދަތުރުފުޅުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.
ރައީސުލްޖުމްހޫރިއްޔާގެ އަރިހުގައި ބީއެމްއެލްގެ ސީއީއޯ އަދި މެނޭޖިން ޑިރެކްޓަރ މުޙައްމަދު ޝަރީފާއި އުކުޅަހު ކައުންސިލްގެ ރައީސް ބައިވެރިވެލެއްވިއެވެ.
ލޯކަލް ޓޫރިޒަމްގައި ކުރިއަރަމުން އަންނަ އުކުޅަހުގައި ބީއެމްއެލްގެ ޚިދުމަތް ފަށައި ޑޮލަރު އޭޓީއެމްގެ ޚިދުމަތް ފެށުމާއެކު އެރަށުގެ ރައްޔިތުންނަށް ބޮޑު ލުއިފަސޭހައެއް ލިބިގެންދާނެއެވެ.
އއ. އަތޮޅުގެ 8 ރަށަށް ކުރައްވާ ދަތުރުފުޅުގައި އެ އަތޮޅު ތޮއްޑޫގައި ވެސް ޑޮލަރު އޭޓީއެމް ވަނީ ބަހައްޓައިފައެވެ. ޑޮލަރު އޭޓީއެމް ތޮއްޑޫ އާއި އުކުޅަހުގައި ބެހެއްޓިއިރު، އެ އަތޮޅުގެ ހުރިހާ ރަށަކަށް ބޭންކް އޮފް މޯލްޑިވްސް (ބީއެމްއެލް) ގެ އޭޓީއެމް ޚިދުމަތް ވަނީ ފުޅާކޮށްފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުކުޅަހަށް ވަޑައިގަތީ ރޭގައެވެ. އެރަށުން އެމަނިކުފާނަށް ވަނީ ހޫނު މަރުޙަބާއެއް ދަންނަވައިފައެވެ. ރައީސުލްޖުމްހޫރިއްޔާ އުކުޅަހު ރައްޔިތުންނާ ބައްދަލުކުރައްވައި ޖަލްސާ ބޭއްވެވީ ރޭ އެރަށު ކޮންވެންޝަން ސެންޓަރުގައެވެ.
ބިމުގެ ދަތިކަން ކުރިމަތިވެފައިވާ އުކުޅަހުގެ ލޭންޑް ޔޫސް ޕްލޭން އިޞްލާހުކޮށް އެރަށުގައި ލޯކަލް ޓޫރިޒަމަށް ޚާއްޞަކޮށްފައިވާ ބިންތަކުން 250 ގޯތި ދޫކުރެވޭގޮތް ފަހިކޮށްދެއްވާނެކަމަށް ރޭގެ ޖަލްސާގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވިއެވެ.
ރޭގެ ޖަލްސާގައި ވަނީ އުކުޅަހުގައި ތިން މަޝްރޫޢެއް ކުރިއަށްގެންދަން ނިންމައި އެއްބަސްވުންތަކުގައި ސޮއިކޮށްފައެވެ. ޖަލްސާގައި ސޮއިކުުރުން އޮތީ އުކުޅަހު ދޯނި އެހެލާ ސަރަޙައްދު ތަރައްޤީ ކުުރުމާއި އުކުޅަހު ސުކޫލުގައި އޮފީސް އިމާރާތެއް ޤާއިމުކުރުމާއި ސްޕޯޓްސް ކޮމްޕްލެކްސް މަޝްރޫޢުގައެވެ.
އުކުޅަހުގައި ޑޮލަރު އޭޓީއެމްގެ ޚިދުމަތް ފެށުމުގެ އިތުރުން، މިއަދު ހެނދުނު އެރަށުގައި ވަނީ ފުލުހުންގެ މަރުކަޒުގެ ބިންގާ ވެސް އަޅައިފައެވެ.
ކިޔުންތެރިންގެ ހިޔާލު