މިއަހަރުގެ ޖެނުއަރީ މަހުން ފެށިގެން މިދިޔަ މަހުގެ ނިޔަލަށް މާލެ ސަރަހައްދުގައި 1000 އަށްވުރެ ގިނަ އެކްސިޑެންޓުގެ މައްސަލަ ރިޕޯޓުކޮށްފައިވާ ކަމަށް ފުލުހުން ބުނެފިއެވެ.
ފުލުހުން އާންމުކުރި ތަފާސްހިސާބުތަކުން ދައްކާގޮތުން، މާލެ ސިޓީގައި މިދިޔަ މަހުގެ ނިޔަލަށް މިއަހަރު ޖުމުލަ 1101 އެކްސިޑެންޓު ހިނގިއެވެ. މާލެ ސިޓީގައި ކޮންމެ މަހަކު ވެސް 100 އާއި 200 އާ ދެމެދު މަގުމަތީގެ އެކްސިޑެންޓުތައް ހިނގާ ކަމަށް ތަފާސްހިސާބުތަކުން ދައްކައެވެ.
މިއަހަރުގެ ތެރޭގައި އެންމެ ގިނައިން އެކްސިޑެންޓު ހިނގާފައިވަނީ ފެބްރައުރީ މަހުއެވެ. ފެބްރުއަރީ މަހު 215 އެކްސިޑެންޓު ހިނގާފައިވާ އިރު، އޭގެ ތެރެއިން އެންމެ ގިނައީ ސައިކަލާއި ކާރު ޖެހިގެން ހިނގާފައިވާ އެކްސިޑެންޓުތަކެވެ. އެއީ 295 އެކްސިޑެންޓެކެވެ. ދެން އެެންމެ ގިނައީ ދެ ސައިކަލު ޖެހިގެން ހިނގާފައިވާ އެކްސިޑެޓުތަކެވެ. އެ އަދަދު ވަނީ 267 އަށް އަރައިފައެވެ.
ރޭގަނޑުގެ ވަގުތުތަކުގައި 356 އެކްސިޑެންޓު ހިނގާފައިވާ ކަމަށް ތަފާސްހިސާބުތަކުން ދައްކާ އިރު، ދުވާލުގެ ވަގުތުތަކުގައި ހިނގާފައިވަނީ 745 އެކްސިޑެންޓެވެ. އޭގެ ތެރެއިން 61 ޕަސެންޓު އެކްސިޑެންޓުތަކަކީ ނުރައްކާތެރި އެކްސިޑެންޓުތަކުުގެ ގޮތުގައި ވަނީ ފާހަގަކޮށްފައެވެ.
ބްރިޖު އަދި ހައިވޭގައި 190 އެކްސިޑެންޓު ހިނގާފައިވާ އިރު، މާލޭގައި 911 އެކްސިޑެންޓު ހިނގާފައިވާ ކަމަށްވެސް ފުލުހުންގެ ތަފާތު ހިސާބުތަކުން ދައްކައެވެ.
ކިޔުންތެރިންގެ ހިޔާލު