މީސް މީޑިއާގައި އާއްމު އިޖުތިމާއީ މިންގަނޑާއި ހިލާފު މަންޒަރުތައް އާއްމުކުރާ މިހެއް ކަމަށްވާ މުހައްމަދު ނަބީލް (ޔާޔާ ނަބީލް) މަސްތުވާތަކެތީގެ މައްސަލައެއްގައި އުމުރަށް ޖަލަށްލާން ކްރިމިނަލް ކޯޓުން ހުކުމްކޮށްފިއެވެ.
އޭނާގެ މައްޗަށް މި ހުކުމް ކޮށްފައި ވަނީ އޭނާ އާއި ދ. ކުޅުދުއްފުށި، ބިޗާނާ، އާދަމް މުހައްމަދު، މަސްތުވާތަކެތި ގެންގުޅެ އެތަކެތީގެ ވިޔަފާރިކުރާ ކަމަށް ފުލުހުންނަށް ލިބުނު މައުލޫމާތަކާ ގުޅިގެން އޮކްޓޫބަރު 31، 2017 ވަނަ ދުވަހު އެ މީހުން ތިބި މއ. ބްރައިޓްބްލޫ ގޭގައި ހުންނަ ކުއްޔަށްދޭ ކޮޓަރި ބަލައިފާސްކުރިއިރު، މަސްތުވާތަކެތި ފެނުމުންނެވެ.
ފުލުހުން އެ ކޮޓަރިއަށް ގޮސް ދޮރުގައި ޓަކި ޖެހުމުން ވެސް ނުހުޅުވުމުން ގަދަކަމުން ދޮރު ހުޅުވައިގެން ވަދެ ބެލި އިރު މަސްތުވާތަކެތި ފެނިފައިވެއެވެ. އަދި ޔާޔާ ނަބީލްގެ ގެ ކަމަށްވާ ގ. ކަމަރާ ގެއިން ވެސް ޑްރަގް ވަނީ ފެނިފައެވެ.
ދައުލަތުން އުފުލި ކެނަބިސް ޓްރެފިކް ކުރުމުގެ ދައުވާގެ މައްސަލަ ބެލުމަށްފަހު ކްރިމިނަލް ކޯޓުން އިއްވި ހުކުމްގައި ވަނީ ޔާޔާ ނަބީލާއި އާދަމް މުހައްމަދު އުމުރަށް ޖަލަށްލުމާއެކު 100,000 ރުފިޔާއިން އޭނާ ޖޫރިމަނާކޮށްފައެވެ.
މި މައްސަލައި މި ދެމީހުން އެ ކޮޓަރިން ހައްޔަރުކޮށް ފާސްކުރި އިރު 20.7422 ގްރާމް ކެނަބިސް ވަނީ ފެނިފައެވެ. އަދި މަސްތުވާތަކެތި ކިރުމަށް ބެނުންކުރާ ދެ ކައްޓާވެސް ވަނީ ފެނިފައެވެ.
ޝަރީއަތުގެ މަޖިލީހުގައި ޔާޔާ ނަބީލް ވަނީ އޭނާ ދިރިއުޅޭ ކޮޓަރީގެ އަލަމާރީގެ ޝެލްފުގައި ޑްރަގް ހުރި ކަމަށް އެއްބަސްވެފައެވެ.
ފުލުހުން އޭނާގެ ގެއަށްގޮސް ބެލި ބެލުމުން 231.3015 ގްރާމްގެ ކެނަބިސްވަނީ ދަޅެއްގެ ތެރެއިން ލިބިފައެވެ. އޭގެއިތުރަށްވެސް ވަކިން އެހެން 2 ދަޅަކުންވެސް ވަނީ 25 ގްރާމާއި 85 ގްރާމްގެ ކެނަބިސް ފެނިފައެވެ.
ކިޔުންތެރިންގެ ހިޔާލު