އާމްދަނީއާއި ހިލޭ އެހީގެ ގޮތުގައި ދައުލަތުގެ ބަޖެޓަށް މިމަހުގެ 12 ވަނަ ދުވަހުގެ ނިޔަލަށް 17 ބިލިއަން ރުފިޔާ ލިބިއްޖެއެވެ.
ފިނޭންސް މިނިސްޓްރީން މިދިޔަ ބުރާސްފަތި ދުވަހު ނެރުނު ނެރުނު ވީކްލީ ފިސްކަލް ޑިވެލޮޕްމެންޓް ރިޕޯޓުގައިވާ ގޮތުން ޓެކްސް ރޭޓްތަކަށް ގެނައި ބަދަލުތަކާ ގުޅިގެން، ޖުމުލަ 13.2 ބިލިއަން ރުފިޔާ ވަނީ ޓެކްސް އާމްދަނީގެ ގޮތުގައި ލިބިފައެވެ.
އޭގެ ތެރެއިން ގްރީން ޓެކުހުގެ ގޮތުގައި ލިބުނު އާމްދަނީގެ މިންވަރު މިދިޔަ އަހަރުގެ މި މުއްދަތާ އަޅައިބަލާއިރު 88.5 އިންސައްތަ ވަނީ އިތުރުވެފައެވެ. އަދި އެއާޕޯޓް ސާވިސް ޗާޖުގެ ގޮތުގައި ލިބުނު އާމްދަނީ 46.9 ޕަސެންޓަށް ވަނީ އިތުރުވެފައެވެ.
ރިޕޯޓުގައިވާ ގޮތުން އެއާޕޯޓް ޑިވެލޮޕްމަންޓް ފީގެ ގޮތުގައި މިދިޔަ އަހަރުގެ މި މުއްދަތާ އަޅައިބަލާއިރު ލިބުނު އާމްދަނީ 44.5 ޕަސެންޓް ވަނީ އިތުރުވެފައެވެ. އެއާޕޯޓް ޑިވެލޮޕްމެންޓް ފީގެ ގޮތުގައި ލިބުނު އާމްދަނީ އިތުރުވީ ރާއްޖެއަށް ޒިޔާރަތްކުރި ފަތުރުވެރިންގެ އަދަދު މިދިޔަ އަހަރުގެ މި މުއްދަތާ އަޅައިބަލާއިރު ގާތްގަނޑަކަށް ނުވަ ޕަސެންޓަށް އިތުރުވެ، އެއް މިލިއަނަށްވުރެ ގިނަ ފަތުރުވެރިން ޒިޔާރަތް ކުރުމުން ކަމަށް ރިޕޯޓުގައި ބުންޏެވެ.
މި އިތުރުވުމާއެކު، މިއަހަރުގެ މި މުއްދަތުގެ ތެރޭގައި ދައުލަތަށް ލިބިފައިވާ ޖުމުލަ އާމްދަނީއާއި ހިލޭ އެހީ ވަނީ ނިމިގެންދިޔަ އަހަރުގެ މި މުއްދަތާ އަޅައިބަލާއިރު ހަ ޕަސެންޓަށް އިތުރުވެފައެވެ. އާމްދަނީގެ އިތުރުވުމާއެކު ސޮވެރިން ޑިވެލޮޕްމަންޓް ފަންޑަށް ޖަމާކުރި ފައިސާގެ އަދަދު ވަނީ 42.9 ޕަސެންޓަށް އިތުރުވެފައެވެ.
މި އަދަދުތަކުން އެނގޭ ގޮތުގައި، ޓެކްސް ރޭޓުތަކަށް ގެނައި ބަދަލާއެކު ރާއްޖޭގެ ފަތުރުވެރިކަމަށް ނުރަނގަޅު އަސަރެއް ނުކުރާ ކަމަށް ރިޕޯޓުގައި ބުންޏެވެ.
ކިޔުންތެރިންގެ ހިޔާލު