ޕޮލިސް ކޮމިޝަނަރގެ މަގާމަށް އިސްމާޢީލް ނަވީން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު އައްޔަން ކުރައްވައިފި އެވެ.
އާ ޕޮލިސް ކޮމިޝަނަރ އައްޔަން ކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ޚާއްސަ ރަސްމިއްޔާތެއްގަ އެވެ.
އާ ޕޮލިސް ކޮމިޝަނަރގެ މަގާމަށް ނަވީން އައްޔަން ކުރެއްވީ އެ މަގާމުގައި ކުރިން ހުންނެވި ޢަލީ ޝުޖާޢު އެޕްެރީލް 25 ވަނަ ދުވަހު އިސްތިޢުފާ ދެއްވުމުންނެވެ. ޝުޖާޢު އިސްތިޢުފާ ދެއްވުމުން ޕޮލިސް ސާވިސް ވަގުތީ ގޮތުން ހިންގެވީ ވެސް ނަވީން އެވެ.
ޕޮލިސް ކޮމިޝަނަރުގެ މަގާމަށް ހުޅުވާލި މުއްދަތުގެ ތެރޭގައި އެ މަގާމަށް ވަނީ ނަވީންގެ އިތުރުން ޑެޕިއުޓީ ކޮމިޝަނަރ ފަރުހާދު ފިކުރީ އާއި އެސިސްޓެންޓް ކޮމިޝަނަރ އަޙުމަދު ޝަމީމް ކުރިމަތިލައްވައިފަ އެވެ. މި ތިން ބޭފުޅުންނާ ޕޮލިސް ބޯޑުން އިންޓަވިއު ކުރުމަށް ފަހު ނިންމާފައި ވަނީ ތިން ބޭފުޅުން ވެސް ޝަރުތު ފުރިހަމަވާ ކަމަށެވެ.
ފުލުހުންގެ ޤާނޫނުގައިވާ ގޮތުން ޕޮލިސް ކޮމިޝަނަރގެ މަގާމަށް ބޭފުޅަކު އައްޔަން ކުރައްވާނީ ރައީސުލްޖުމްހޫރިއްޔާ އެވެ. ރައީސް، އެ މަގާމަށް ބޭފުޅަކު އައްޔަން ކުރައްވަނީ ހޯމް މިނިސްޓަރގެ ލަފާގެ މަތިންނެވެ. ހޯމް މިނިސްޓަރ، ރައީސް އަށް ލަފާ އަރުވާނީ ޕޮލިސް ބޯޑުން އިންޓަވިއު ކުރުމަށް ފަހު ހުށަހަޅާ ރިޕޯޓް ދިރާސާ ކުރުމަށް ފަހު އެވެ.
ނަވީން ވަނީ ފުލުހުންގެ އެކި މަގާމުތަކުގައި 30 އަހަރަށް ވުރެ ގިނަ ދުވަހު ޚިދުމަތް ކުރައްވައިފަ އެވެ.
ކިޔުންތެރިންގެ ހިޔާލު