ބޯހިޔާވަހިކަމަށް ލޯނު ދޫކުރާ “ހިޔާވަހި” ފައިނޭންސިން ސްކީމަށް ކުރިމަތިލުމުގެ މުއްދަތު އަންނަ މަހުގެ ނިޔަލަށް އިތުރުކޮށްފިއެވެ.
ކުޑަ އިންޓަރެސްޓް ރޭޓެއްގައި ދޫކުރާ “ހިޔާވަހި” ފައިނޭންސިން ސްކީމަށް ކުރިމަތިލުމަށް ކުރިން ހުޅުވާލާފައިވަނީ މިއަދުގެ ނިޔަލަށެވެ.
ހައުސިން މިނިސްޓަރު ޑރ. އަބްދުﷲ މުއްތަލިބު އެކްސްގައި މިރޭ ކުރެއްވި ޕޯސްޓެއްގައި ވިދާޅުވީ، މިދިޔަ އަހަރުގެ ނޮވެމްބަރު އަށްވަނަ ދުވަހުން ފެށިގެން ހުޅުވާލާފައިވާ އެ ސްކީމަށް ކުރެހުމާއި ބީއޯކިއު ހުށަހަޅަންޖެހޭ ކަމަށާއި އެއީ ވަގުތު ބޭނުންވާ ކަމެއް ކަމަށެވެ.
އެހެންވެ ހިޔާވަހި ސްކީމަށް ހުށަހެޅުމުގެ މުއްދަތު އިތުރުކޮށްދިނުމަށް ވަރަށް ގިނަ ބަޔަކު އެދެމުންދާތީ، އެ މުއްދަތު އަންނަ މަހުގެ ނިޔަލަށް އިތުރުކޮށްދިނުމަށް ނިންމާފައިވާ ކަމަށް މިނިސްޓަރު މުއްތަލިބު ވިދާޅުވިއެވެ.
ހިޔާވަހި ސްކީމު ދޫކުރަން ހަމަޖެހިފައިވަނީ ފަސް ޕަސަންޓުގެ އިންޓަރެސްޓު ރޭޓުގައި، 25 އަހަރުގެ ތެރޭގައި އަނބުރާ ލޯނު ދައްކާ ގޮތަށެވެ. އަލަށް ގެދޮރު އިމާރާތްކުރާ މީހުންނަށް ހާއްސަކުރި އެ ސްކީމުން ގެއެއް އިމާރާތްކުރަން ފަށައި ނުނިމި ހުރި ނަމަ، އެ މަސައްކަތް ނިންމަން ވެސް ލޯނު ލިބެއެވެ.
އެ ސްކީމުން ލޯނު ދޫކުރާނީ ބޭންކް އޮފް މޯލްޑިވްސް (ބީއެމްއެލް) އާއި މޯލްޑިވްސް އިސްލާމިކް ބޭންކް (އެމްއައިބީ) އަދި ހައުސިން ޑިވެލޮޕްމަންޓް ފައިނޭންޝިއަލް ކޯޕަރޭޝަން (އެޗްޑީއެފްސީ) މެދުވެރިކޮށެވެ.
ކިޔުންތެރިންގެ ހިޔާލު