ނަމާދަށް ހޭލުންތެރި މުޖުތަމަޢުއެއް އުފެއްދުމަށް އިސްކަންދީ، އިސްލާމީކަންތައްތަކާ ބެހޭ ވުޒާރާއިން މިއަހަރު ފެށި ‘ނަމާދު މަތިވެރިކުރުން’ ޕްރޮގުރާމުގެ 170 ސެޝަން ބާއްވައިފިއެވެ.
މި ސެޝަންތައް ބާއްވާފައިވަނީ މާލެއާއި ރާއްޖޭގެ އެކި ރަށްތަކުގައެވެ. އެގޮތުން މާލޭގައި ސަރަހައްދުގައި 60 ސެޝަން ބާއްވާފައިވާއިރު، ހއ. ހޯރަފުށީގައި 8 ސެޝަން، ހއ. ކެލާގައި 16 ސެޝަން، ހދ. ކުޅުދުއްފުށީގައި 18 ސެޝަން، ހދ. ވައިކަރަދޫގައި 6 ސެޝަން، ޅ. ނައިފަރުގައި 15 ސެޝަން، ވ. ކެޔޮދޫގައި 33 ސެޝަން، މ. ކޮޅުފުށީގައި 14 ސެޝަން ވަނީ ބާއްވާފައެވެ. މި ސެޝަންތަކުގައި 851 ދަރިވަރުން ބައިވެރިވެފައިވެއެވެ.
މި ސެޝަންތައް ނަންގަވައިދެއްވަނީ ދީނީ ޢިލްމުވެރިންނެވެ.
ރައީސް ޑރ. މުހައްމަދު ރާއްޖޭގެ ވެރިކަމާ ހަވާލުވެވަޑައިގަތްފަހުން ދީނީގޮތުން ދިވެހީން ހޭލުންތެރިކުރުމަށް ގިނަ މަސައްކަތްތަކެއް އަންނަނީ ކުރަމުންނެވެ. އެގޮތުން ރާއްޖޭގައި ފުރަތަމަ ފަހަރަށް ޒަކާތު ފަންޑުން ސްކޮލާޝިޕްތައް ވަނީ ދީފައެވެ.
އެ ސްކޮލާޝިޕްތައް ދިނީ ދީނީ އިލްމުގެ ދާއިރާއިން ޕީއެޗްޑީއާ ހަމައަށް ކިޔެވުމަށާއި ބައެއް ދާއިރާތަކުން ޑޮކްޓަރުކަން ކިޔެވުމަށެވެ.
މީގެއިތުރުން ކީރިތިޤުރުއާން ހިތުދަސްކުރުމަށް ހިތްވަރުދިނުމުގެ ގޮތުން ކޮންމެ ރަމަޟާން މަހެއްގެ 27 ވަނަ ދުވަހުގެ ރޭ ހާފިޒުންގެ އަގުވަޒަންކުރުމުގެ ރަސްމިއްޔާތެއް ބާއްވަން ވަނީ ނިންމާފައެވެ.
ކިޔުންތެރިންގެ ހިޔާލު