ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން މި އަހަރު ހައްޖާއި އުމްރާގެ އަޅުކަން އަދާކުރުމަށް ފޮނުވާނެ މުވައްޒަފުން ހޮވައިފިއެވެ.
ސްޓެލްކޯގެ މުވައްޒަފުންގެ ތެރެއިން ހައްޖުގެ އަޅުކަން އަދާކުރުމަށް ދެ ފިރިހެން މުވައްޒަފަކާއި އަންހެން މުވައްޒަފަކު ހޮވާފައިވާއިރު، އުމްރާގެ އަޅުކަން އަދާކުރުމަށް ވެސް ދެ ފިރިހެން މުވައްޒަފަކާއި އަންހެން މުވައްަޒަފަކު ހޮވާފައި ވެއެވެ.
ސްޓެލްކޯއިން ބުނީ، މި ފުރުސަތަށް އެދި ހުށަހެޅި މުވައްޒަފުންގެ ތެރެއިން ޝަރުތު ހަމަވާ ފަރާތްތަކުގެ މެދުގައި ގުރުއަތުލައިގެން މުވައްޒަފުން ހޮވާފައިވާ ކަމަށާއި މިއީ ކުންފުނީގެ މުވައްޒަފުންނަށް ކޮންމެ އަހަރަކުވެސް ދެމުންގެންދާ ހާއްސަ ފުރުސަތެއް ކަމަށެވެ.
“މިކުންފުނީގެ މުވައްޒަފުންނަށް ހުޅުވާލި ހައްޖާއި ޢުމްރާގެ މަތިވެރި އަޅުކަން އަދާކުރުމުގެ ފުރުޞަތަށް އެދި ހުށަހެޅި މުވައްޒަފުންގެ ތެރެއިން ޝަރުތު ހަމަވާ މުވައްޒަފުންގެ މެދުގައި ގުރުއަތުލުން ވަނީ ކުރިއަށް ގެންގޮސްފައި. މިގޮތުން، މި އަހަރުވެސް ހައްޖުގެ އަޅުކަމަށް ދެ ފިރިހެން މުވައްޒަފުންނާއި އެއް އަންހެން މުވައްޒަފަކު، އަދި އުމްރާގެ އަޅުކަމަށް ދެ ފިރިހެން މުވައްޒަފުންނާއި އެއް އަންހެން މުވައްޒަފަކު ވަނީ ހޮވާފައި. ގުރުއަތުން ހޮވުނު މުވައްޒަފުންނަށް ވަރަށް ހޫނު މަރުޙަބާއެއް ދަންނަވަން.” ސްޓެލްކޯއިން ބުންޏެވެ.
ހައްޖުގެ އަޅުކަން އަދާކުރުމުގެ ފުރުސަތު ދެނީ ސްޓެލްކޯއަށް 15 އަހަރަށްވުރެ ގިނަ ދުވަހު ޚިދުމަތްކޮށްފައިވާ މުވައްޒަފުންނަށެވެ. އަދި އުމްރާގެ އަޅުކަން އަދާކުރުމުގެ ފުރުސަތު ދެނީ ފަސް އަހަރަށްވުރެ ގިނަ ދުވަހު ޚިދުމަތްކޮށްފައިވާ މުވައްޒަފުންނަށެވެ.
އެ ކުންފުނިން ބުނީ، މި ފުރުސަތު ދިނުމަކީ މުވައްޒަފުންގެ މެދުގައި ވަޒީފާގެ ހިތްހަމަޖެހުން އިތުރުކޮށް، ދީނީ އަޅުކަންތައް އަދާކުރުމަށް ބާރުއެޅުމުގެ ގޮތުން ކުރާ މަސައްކަތެއް ކަމަށެވެ. މި އަހަރުގެ ހައްޖު މޫސުމަށް ތައްޔާރުވުމުގެ ގޮތުން ހޮވުނު މުވައްޒަފުންނަށް ކުރިއަށް އޮތް ހަފްތާތަކުގައި ހާއްސަ ތަމްރީނު ޕްރޮގްރާމްތަކެއް ހިންގުމަށް ވެސް ސްޓެލްކޯއިން ވަނީ ރާވާފައެވެ.
ކިޔުންތެރިންގެ ހިޔާލު