ބޭންކް އޮފް މޯލްޑިވްސް އިން ޑިޖިޓަލް ޚިދުމަތްތައް ފުޅާކޮށް، އިންޤިލާބީ ބަދަލުތަކެއް ގެނައުމަށް ނިންމައިފި
ބޭންކް އޮފް މޯލްޑިވްސް (ބީއެމްއެލް) އިން އެ ބޭންކުގެ ޑިޖިޓަލް ޚިދުމަތްތަކަށް ފާހަގަކޮށްލެވޭ ބަދަލުތަކެއް ގެނައުމަށް ނިންމައިފިއެވެ. މި ބަދަލުތަކާއެކު، ކަސްޓަމަރުންނަށް ބޭންކުގެ ބްރާންޗުތަކަށް ޒިޔާރަތްނުކޮށް، ހުރިހާ ބޭންކިންގ ޚިދުމަތްތަކެއް ލިބޭނެ ގޮތް ހަމަޖެހިގެންދާނެއެވެ. މި އައު ބަދަލުތައް ތަންފީޒުކުރަން ފަށާނީ ކުރިއަށް އޮތް ރަމަޟާން މަހާ ދިމާކޮށެވެ.
ބީއެމްއެލްއިން އަލަށް ތަޢާރަފުކުރާ 6 ޚިދުމަތުގެ ތެރޭގައި ހިމެނެނީ:
1. އާންމު ފަރުދުންނަށް އޮންލައިންކޮށް އެކައުންޓް ހުޅުވުމުގެ ޚިދުމަތް
2. ވިޔަފާރިތަކަށް އޮންލައިންކޮށް އެކައުންޓް ހުޅުވުމުގެ ޚިދުމަތް
3. ހުރިހާ ބާވަތެއްގެ ލޯނު އަދި ފައިނޭންސްތަކަށް އޮންލައިންކޮށް އެދުމުގެ ޚިދުމަތް
4. ރާއްޖެއިން ބޭރުން އަންނަ 10,000 ޑޮލަރު ހަމައަށްގެ ފައިސާ ވަގުތުން ވެރިފައިކޮށް އެކައުންޓަށް ޖަމާކުރުމުގެ ޚިދުމަތް
5. ރާއްޖެއިން ބޭރަށް 5,000 ޑޮލަރު ހަމައަށްގެ ފައިސާ އޮންލައިންކޮށް ފޮނުވުމުގެ ޚިދުމަތް
6. ވިޔަފާރިތަކަށް ބިޒްނަސް ކާޑުން ނަގުދު ފައިސާ ނެގުމުގެ އަދަދު 200,000 ރުފިޔާއަށް އިތުރުކުރުން
މީގެ އިތުރުން، ބޭންކުން ވަނީ އިތުރު ޚިދުމަތްތަކެއް ތަޢާރަފުކުރުމަށް ރޭވިފައެވެ. މީގެ ތެރޭގައި ކަސްޓަމަރުންގެ ކާޑުތައް ގެއަށް ފޮނުވައިދިނުމާއި، އޮންލައިންކޮށް ކާޑު އެކްޓިވޭޓްކުރުމާއި ޕިން ބަދަލުކުރުމުގެ ޚިދުމަތް ހިމެނެއެވެ.
ވިޔަފާރިތަކރިތަކަށް އަމާޒުކޮށް، ޕޭމަންޓް ގޭޓްވޭ މެދުވެރިކޮށް ބަލައިގަންނަ ފައިސާ 24 ގަޑިއިރުތެރޭގައި އެކައުންޓަށް ޖަމާކޮށްދިނުމަށް ވަނީ ނިންމާފައެވެ. އަދި އޭޓީއެމްއިން ފައިސާ ނެގުމުގައި ދިމާވާ މައްސަލަތައް 1 ގަޑިއިރުތެރޭގައި ހައްލުކޮށްދިނުމަށްވެސް ވަނީ ނިންމާފައެވެ.
ބީއެމްއެލްއިން މި ގެންނަ ބަދަލުތަކާއެކު، ކަސްޓަމަރުންނަށް ގިނަ ޚިދުމަތްތަކެއް ގޭގައި ތިބެގެން ލިބޭނެ ގޮތް ހަމަޖެހިގެންދާނެއެވެ.
ކިޔުންތެރިންގެ ހިޔާލު