އައްޑޫ ސިޓީގެ ގުޅިފައިވާ ރަށްތަކަށް ކުރިމަތިވެފައިވާ ކަރަންޓުގެ މައްސަލަ ޙައްލުކުރުމަށްޓަކައި 1.8 މެގަވޮޓުގެ ޖަނަރޭޓަރެއް އެ ސިޓީއަށް ގެންދެވިއްޖެއެވެ.
ފެނަކަ ކޯޕަރޭޝަނުން “އެކްސް” މެދުވެރިކޮށް ޙިއްޞާކުރި މަޢުލޫމާތުގައިވާ ގޮތުން، އައްޑޫ ސިޓީގެ ގުޅިފައިވާ ރަށްތަކަށް ދިމާވެފައިވާ ކަރަންޓުގެ މައްސަލަ ޙައްލުކުރުމުގެ މަސައްކަތުގެ ތެރެއިން 1.8 މެގަވޮޓުގެ އައު ޖެނެރޭޓަރެއް މިހާރު ވަނީ އެ ސިޓީއަށް ފޯރުކޮށްދެވިފައެވެ.
ފެނަކައިން އިއްޔެ ނެރުނު ނޫސްބަޔާނުގައި ފާހަގަކޮށްފައިވަނީ، އައްޑޫ ސިޓީގެ ހިތަދޫއާއި ގުޅިފައިވާ ރަށްތަކަށް ކަރަންޓުގެ ޚިދުމަތް ފޯރުކޮށްދޭ މައި ކަރަންޓުގެއިން ޚިދުމަތްދެމުންދިޔަ ޖެނެރޭޓަރުތަކުގެ ތެރެއިން ތިން ޖެނެރޭޓަރަށް މައްސަލަ ދިމާވެ، އިތުރު އެއް ޖެނެރޭޓަރު މަރާމާތު ނުކުރެވޭވަރަށް ހަލާކުވެފައިވާ ކަމަށެވެ. މިކަމުގެ ސަބަބުން އެ ރަށްތަކަށް ބޭނުންވާ މިންވަރަށް ކަރަންޓު އުފެއްދުމުގައި ދަތިތަކެއް ކުރިމަތިވެ، އެކި ވަގުތުތަކުގައި އެކި ސަރަޙައްދުތަކުން ކަރަންޓު ކެނޑެމުންދާތީ، އެކަމަށް އަވަސް ޙައްލެއް ހޯދުމުގެ މަސައްކަތް ކުރިއަށްދާ ކަމަށް ވެސް ބަޔާނުގައި ބަޔާންކޮށްފައިވެއެވެ.
ހަލާކުވެފައިވާ ޖެނެރޭޓަރުތަކުގެ ތެރެއިން އެއް ޖެނެރޭޓަރު މަރާމާތުކޮށް މިހާރު ވަނީ ޚިދުމަތަށް ނެރެވިފައެވެ. އަދި ދެވަނަ ޖެނެރޭޓަރު މަރާމާތުކޮށް މި ހަފުތާގެ ނިޔަލަށް ޚިދުމަތަށް ނެރެވޭނެއެވެ. މީގެ އިތުރުން، ރާއްޖެއިން ބޭރުން ސްޕެއަރ ޕާޓްސް ގެނެސްގެން ތިންވަނަ ޖެނެރޭޓަރު މަރާމާތުކޮށް، ކުރިއަށް އޮތް ހަފުތާއެއްހާ ދުވަހުގެ ތެރޭގައި ޚިދުމަތަށް ނެރެވޭނެ ކަމަށް ލަފާކުރެވެއެވެ.
ރަމަޟާން މަހަކީ ޚާއްޞަކޮށް ކޮންމެ އަހަރަކުވެސް ކަރަންޓުގެ ބޭނުންކުރުން އިތުރުވާ މަހެއް ކަމަށްވުމާއެކު، އަދި އައްޑޫގައި ތަރައްޤީގެ އެކިއެކި މަޝްރޫޢުތައް ކުރިއަށްދާއިރު ދުވަހުން ދުވަހަށް ކަރަންޓަށް ބޭނުންވާ މިންވަރު އިތުރުވަމުންދާތީ، މިކަމަށް ޚާއްޞަ ސަމާލުކަމެއް ދީގެން އެ ކުންފުނިން މަސައްކަތްތަކެއް ކުރަމުންގެންދާ ކަމަށްވެސް އެ ބަޔާނުގައި ފާހަގަކޮށްފައިވެއެވެ.
ކިޔުންތެރިންގެ ހިޔާލު