މޯލްޑިވިއަން އެއަރލައިންސްއިން ޗައިނާގެ ޝަންހާއީއަށް ފަށާފައިވާ ސީދާ ދަތުރުތަކުގެ ފުރަތަމަ ފްލައިޓުން ރާއްޖެއަށް ގިނަ އަދަދެއްގެ ފަތުރުވެރިން ވަނީ އައިސްފައެވެ. މިއަދު ހެނދުނު ވެލާނާ އިންޓަރނޭޝަނަލް އެއަރޕޯޓަށް ޖައްސާލި މި ފްލައިޓުގައި ޝަންހާއީއިން 243 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.
މޯލްޑިވިއަންގެ ޝެޑިއުލް ދަތުރުތައް ޝަންހާއީއަށް ފަށާފައިވަނީ މިމަހުގެ 27 ވަނަ ދުވަހުއެވެ. މިހާރު މޯލްޑިވިއަނުން ދަނީ ޗައިނާގެ 3 މަންޒިލަކަށް ސީދާ ދަތުރުތައް ކުރަމުންނެވެ. އެއީ ޗެންޑޫ، ބެއިޖިން އަދި ޝަންހާއީއެވެ.
ޗައިނާއަކީ ރާއްޖެއަށް އެންމެ ގިނަ ފަތުރުވެރިން އަންނަ ޤައުމެވެ. މި އަހަރުގެ މިހާތަނަށް ޗައިނާއިން 23،000 އަށްވުރެ ގިނަ ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ. މޯލްޑިވިއަނުން ޗައިނާއަށް މި ފެށި ދަތުރުތަކާއެކު ރާއްޖޭގެ ފަތުރުވެރިކަމަށް އިތުރު ކުރިއެރުމެއް ލިބޭނެކަމަށް ސަރުކާރުން ބުނެއެވެ. އެގޮތުން ޗައިނާއިން ރާއްޖެއަށް އަހަރެއްގެ މައްޗަށް 40،000 ފަތުރުވެރިން ގެނެވޭނެކަމަށް ސަރުކާރުން ވަނީ އަންދާޒާކޮށްފައެވެ.
ކިޔުންތެރިންގެ ހިޔާލު