ދިވެހިރާއްޖެއަކީ ފުދުންތެރި، ތަރައްޤީވެފައިވާ ޤައުމަކަށް ހެދުމަށް ސަރުކާރުން ގެންގުޅޭ ދުރުރާސްތާގެ ތަޞައްވުރުގެ އެންމެ މުހިންމު އެއް ބަޔަކީ، ޤައުމަށް ދިމާވެފައިވާ އިޖުތިމާޢީ އެންމެ ބޮޑެތި މައްސަލަތަކަށް ދާއިމީ ހައްލެއް ހޯދައިދިނުމެވެ. މިގޮތުން، މާލެ ސަރަޙައްދަށް ދިމާވެފައިވާ ބޯހިޔާވަހިކަމުގެ ދަތިކަމަށް ތާރީޚީ ހައްލެއް ގެނައުމަށް ސަރުކާރުން އިސްނަގައިގެން ކުރިއަށްގެންދާ “ރަސްމާލެ” މަޝްރޫޢަކީ ހަމައެކަނި ބިމެއް ހިއްކުމުގެ މަސައްކަތެއް ނޫނެވެ. އެއީ ރައްޔިތުންގެ ދިރިއުޅުމުގެ ފެންވަރު މަތިކޮށް، އިޤްތިޞާދީ އާ ދޮރުތަކެއް ހުޅުވައިދޭނެ ބިޔަ މަޝްރޫޢެކެވެ.
ރާއްޖޭގައި މިވަގުތު އޮތް އެންމެ ތަނަވަސް އަދި ބޮޑު ބިން ކަމުގައިވާ ރަސްމާލެ ތަރައްޤީކުރަނީ ސާފު، ރޭވުންތެރި ޕްލޭނެއްގެ ދަށުންނެވެ. އެގޮތުން ހިއްކުމަށް ހަމަޖެހިފައިވާ ގާތްގަނޑަކަށް 1000 ހެކްޓަރުގެ ބިމުގެ ތެރެއިން 500 ހެކްޓަރު ޚާއްޞަކުރެވިފައިވަނީ ރައްޔިތުންގެ އަސާސީ ބޭނުންތަކާއި ބޯހިޔާވަހިކަމުގެ ޝާމިލު ޙައްލަކަށެވެ. އަދި ބާކީ އޮތް ބައި ތަރައްޤީކުރަނީ ފުޅާ ދާއިރާއެއްގައި ރިއަލް އެސްޓޭޓް ވިޔަފާރިތަކާއި އިޤްތިޞާދީ ޙަރަކާތްތައް ދެމެހެއްޓެނިވި ގޮތެއްގައި ހިންގުމަށެވެ. މި މަޝްރޫޢާ ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، ރައްޔިތުންނަށް ދިނުމަށް ކަނޑައަޅާފައިވާ އެއްވެސް ގޯއްޗެއް ނުވަތަ ފްލެޓެއް މި މަޝްރޫޢުގެ ސަބަބުން އުނިނުވާނެ ކަމުގެ ފުރިހަމަ ޔަޤީންކަން ދެއްވާފައެވެ. ސަރުކާރުގެ އަމާޒަކީ މިއީ ރައްޔިތުންނަށް ސީދާ ފައިދާ ލިބިގެންދާނެ މަޝްރޫޢަކަށް ހެދުމެވެ.
އާބާދީއެއް އެއްތަނަކުން އަނެއް ތަނަކަށް ހިޖުރަކުރާނީ އެތަނެއްގައި ދިރިއުޅުމުގެ ފުރިހަމަ ވަސީލަތްތަކާއި އިޤްތިޞާދީ ފުރުޞަތުތައް އޮވެގެންނެވެ. މާލެއާ 20 މިނެޓުގެ ދުރުމިނުގައި އޮންނަ ރަސްމާލެއަކީ، ކޮންމެ ކަމަކަށް މާލެއަށް ބަރޯސާވާންޖެހޭ ތަނަކަށް ނުހެދުމަށްޓަކައި، އެ ސަރަޙައްދުގައި ވަރުގަދަ އިޤްތިޞާދީ ބިނާއެއް އުފެއްދުމަކީ ކޮންމެހެން ބޭނުންތެރި ކަމެކެވެ. މި މަޤްޞަދު ޙާޞިލުކުރުމަށްޓަކައި ރަސްމާލޭގެ އަނެއް ފަޅީގައި އީގަލް ހިލްސް ކުންފުނިން ތަރައްޤީކުރަނީ “މޯލްޑިވްސް ވޯޓަރފްރަންޓް އެންޑް މެރީނާ” މަޝްރޫޢެވެ.
މި ބިޔަ މަޝްރޫޢާއެކު އެކަނިވެސް ރަސްމާލޭގައި 15،000 އަށްވުރެ ގިނަ ވަޒީފާގެ ފުރުޞަތު އުފެދިގެންދާނެ ކަމަށް އީގަލް ހިލްސްއިން އަންދާޒާކުރެއެވެ. މީގެއިތުރުން، އެ ސަރަޙައްދުގައި ޤާއިމުކުރެވޭ 1500 އެއްހައި ވިޔަފާރި ފިހާރަތައް ހިންގުމުގައި ދިވެހިންނަށް އިސްކަންދެވޭނެއެވެ. އަދި އެތަނުގައި ބިނާކުރެވޭ ވަސީލަތްތަކާއި ގެދޮރު ބެލެހެއްޓުމުގެ ތެރެއިންވެސް ދިވެހި ޒުވާނުންނަށާއި ވިޔަފާރިތަކަށް މަންފާ ލިބޭނެ ގިނަ ފުރުޞަތުތަކެއް ފަހިވެގެންދާނެއެވެ.
މިފަދަ ބޮޑު މަޝްރޫޢެއް ކުރިއަށްދާއިރު، އާންމުން ދިރިއުޅޭ ސަރަޙައްދުތަކުގެ މަގުތައް ހެދުމާއި، އަސާސީ ޚިދުމަތްތައް ޤާއިމުކުރުމަށް ސަރުކާރުން ބޮޑު ޚަރަދެއް ކުރަންޖެހޭނެއެވެ. އެހެންކަމުން ރައްޔިތުންގެ މެދުގައި އޮތް އެންމެ ބޮޑު އެއް ސުވާލަކީ ޢަމަލީ މަސައްކަތްތައް ފެނިގެންދާނީ ކިހާ ދުވަހަކުންތޯއެވެ. މިކަމާ ގުޅޭގޮތުން އީގަލް ހިލްސްގެ ޗެއަރމަން މުޙައްމަދު އަލްއައްބާރު ފާހަގަކުރައްވާ ގޮތުގައި، މި ފެންވަރުގެ މަޝްރޫޢެއްގެ ކުރެހުންތަކާއި، ސްޓްރަކްޗަރަލް، އިލެކްޓްރިކަލް އަދި އެއަރކޮންޑިޝަނިން ފަދަ އިންޖިނިއަރިންގ ޑިޒައިންތައް ފުރިހަމަކޮށް، ޢަމަލީ މައިދާނަށް ނުކުތުމަށް އާންމުގޮތެއްގައި 12 މަސްދުވަސް ނަގައެވެ. ނަމަވެސް އެ ކުންފުނީގެ ތަޖުރިބާގެ އަލީގައި، އެއަށްވުރެ އަވަސް މުއްދަތެއްގެ ތެރޭގައި ޢަމަލީ މަސައްކަތްތައް ފެށުމުގެ އުންމީދު އެބައޮތް ކަމަށް އޭނާ ވިދާޅުވިއެވެ.
ރަސްމާލެ ތަރައްޤީވެގެން އަންނައިރު، މުޖުތަމަޢުގެ ތެރޭގައި ވަކި ދެ ފަންތިއެއް އުފެދި، އާންމު ރައްޔިތުންނަށް އެރަށުގެ ބައެއް ސަރަޙައްދުތައް ބަންދުވެދާނެތޯ އުފެދޭ ސުވާލަށް އަލްއައްބާރު ދެއްވި ޖަވާބަކީ، މި މަސައްކަތްތައް ކުރިއަށްދާނީ ދިވެހި ސަރުކާރުން ކަނޑައަޅާ އުސޫލުތަކާ އެއްގޮތަށް ކަމެވެ. އަދި މިފަދަ ޤައުމީ ތަރައްޤީގެ މަޝްރޫޢުތައް ކާމިޔާބުވާނީ އަބަދުވެސް ރައްޔިތުންނާ ގާތުން، ރައްޔިތުންނާ ގުޅިގެން ކުރިއަށް ގެންދިއުމުން ކަމަށް އޭނާ ޤަބޫލުކުރައްވައެވެ.
އެހެންކަމުން ރަސްމާލެ މަޝްރޫޢަކީ ރާއްޖޭގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމުގެ އިތުރުން، އިޤްތިޞާދީ އައު އިންގިލާބެއް ގެނުވާނެ އުންމީދީ ބިނާއެކެވެ. އިޖުތިމާޢީ އަދި އިޤްތިޞާދީ ހަރަކާތްތެރިކަން އެކުއެކީގައި ކުރިއަށް ގެންދެވޭ މި މަޝްރޫޢު ވެގެންދާނީ، ދިވެހިރާއްޖެ ތަރައްޤީގެ އައު އުސްމިންތަކަކަށް ގެންގޮސްދޭނެ މުހިންމު ބިންގަލަކަށެވެ.
ކިޔުންތެރިންގެ ހިޔާލު