ރަސްމާލޭގައި ތަރައްޤީކުރާ “ވޯޓަރ ފްރޮންޓް އެންޑް މެރީނާ” މަޝްރޫޢުގެ ސަބަބުން ދިވެހިންނަށް ފަހިވާނީ ހަމައެކަނި ވަޒީފާގެ ފުރުޞަތުތަކެއް ނޫން ކަމަށާއި، ފުޅާ ދާއިރާއެއްގައި ވިޔަފާރިކުރުމުގެ ފުރުޞަތުތަކެއްވެސް ތަނަވަސްވެގެންދާނެ ކަމަށް އީގަލް ހިލްސް ކުންފުނީގެ ޗެއާމަން މުޙައްމަދު އަލްޢައްބާރު ވިދާޅުވެއްޖެއެވެ.
ދައުލަތުގެ މީޑިއާއަށް ދެއްވި ބަސްދީގަތުމެއްގައި އަލްޢައްބާރު ވިދާޅުވީ، މި މަޝްރޫޢު ކުރިއަށްގެންދާނީ ދިވެހި ރައްޔިތުންނަށާއި ޤައުމުގެ އިޤްތިޞާދަށް އެންމެ ފައިދާހުރި ގޮތަކަށް ކަމަށެވެ. އެގޮތުން، މަޝްރޫޢަށް ބޭނުންވާ އެންމެހައި ތަކެއްޗާއި ޚިދުމަތްތައް ދިވެހި މާކެޓުން ލިބެން ހުރިނަމަ، އެ ތަކެތި ހޯދުމުގައި އެންމެ އިސްކަމެއް ދޭނީ ދިވެހި ވިޔަފާރިތަކަށް ކަމަށް އޭނާ ފާހަގަކުރެއްވިއެވެ.
މީގެއިތުރުން، މި މަޝްރޫޢުގެ އަމަލީ މަސައްކަތްތައް ނިމި، އެ ސަހަރު ވުޖޫދަށް އަންނައިރު 15،000 އެއްހާ މީހުންނަށް ވަޒީފާގެ ފުރުޞަތު އުފެދިގެންދާނެ ކަމަށް އަލްޢައްބާރު ވިދާޅުވިއެވެ. އޭގެ ތެރޭގައި ތަންތަން ބެލެހެއްޓުމާއި، މަރާމާތު ކުރުމުގެ އިތުރުން ވިޔަފާރިތައް ހިންގުން ހިމެނެއެވެ.
މިއީ ހުރިހާ ޚިދުމަތަކާއި ތަކެއްޗެއް ބޭނުންވާނެ ފުރިހަމަ ސަހަރެއް. ކާބޯތަކެއްޗާއި މަހާއި ތަރުކާރީން ފެށިގެން އެހެނިހެން ހުރިހާ ސާމާނެއް ގަންނަން ޖެހޭނެ. އަޅުގަނޑުމެން އިސްކަންދޭނީ ދިވެހި ވިޔަފާރިތަކުން މި ތަކެތި ގަތުމަށް.
އަލްޢައްބާރު ވިދާޅުވިއެވެ.
އަލްޢައްބާރު އިތުރަށް ހާމަކުރެއްވި ގޮތުގައި، މި ސަހަރުގައި މަދުވެގެން 1،500 ފިހާރަ ހުޅުވިގެންދާނެ ކަމަށް ލަފާކުރެވެއެވެ. އަދި އެ ތަންތަން ހިންގުމަށް ވިޔަފާރިވެރިން ހޮވުމުގައި ދިވެހިންނަށް ޚާއްޞަ އިސްކަމެއް ދެއްވާނެ ކަމަށާއި، ބޭނުންވާ ޙާލަތްތަކުގައި މާލީ އެހީތެރިކަމާއި، މަރާމާތުގެ އެހީތެރިކަން އަދި ބައިނަލްއަޤްވާމީ ކުންފުނިތަކާ ގުޅުވައިދިނުމުގެ އެއްބާރުލުންވެސް ދެއްވާނެ ކަމަށް ވިދާޅުވިއެވެ. މިއީ އެ ކުންފުނިން އެހެން ޤައުމުތަކުގައިވެސް ކާމިޔާބުކަމާއެކު ބޭނުންކޮށްފައިވާ މޮޑެލެއްކަން އޭނާ ފާހަގަކުރެއްވިއެވެ.
ރަސްމާލެއިން ހިއްކާ ބިމުގެ ތެރެއިން 500 ހެކްޓަރުގެ ސަރަޙައްދެއްގައި ކުރިއަށްގެންދާ “މޯލްޑިވްސް ވޯޓަރ ފްރޮންޓް އެންޑް މެރީނާ” މަޝްރޫޢުގެ ޖުމްލަ އިންވެސްޓްމަންޓް 20 ބިލިއަން އެމެރިކާ ޑޮލަރަށް އަރާނެ ކަމަށް ބެލެވެއެވެ. އަދި މި މަޝްރޫޢު ފުރިހަމަވުމުން، ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އަހަރަކު އެއް މިލިއަނަށް އިތުރުވެގެންދާނެ ކަމަށްވެސް ވަނީ އަންދާޒާކުރެވިފައެވެ.
ކިޔުންތެރިންގެ ހިޔާލު